وێ رۆژێ ئەز ل کتێباخانەیەکا دوهۆکێ بووم، دەمێ سێ کچین قۆناغا کولیژێ هاتین و داخواز ژ خودانێ کتێبخانەیی کری کو هندەک کتێبێن وان ڤیاین ب دیالکتا سۆرانی و زمانێ عەرەبی بدەتێ! من ژی ژ وان پرسی: دبت هەمان پرتووک ب دەڤۆکا بادینی ژی هەبن، ما هوین بۆچی بۆ خوە وان نابن؟ ئێکێ ژ وان وەسا بەرسڤا من دا کو ئەو باش د کتێبێن کرمانجی ناگەهن، تایبەت ئەوێن دئێنە وەرگێڕان، ب دروستی پەیاما خوە ناگەهینن.
راستە، دبت ئەو بەرسڤا وێ کچێ دای نەبوویە دیاردە، لێ مە بڤێت نەڤێت جهێ پرسیارێیە: بۆچی ئەو کتێبێن رۆشەنبیری یێن ل بادینان هەین ژی، چ خویانی بن یان وەرگێڕایێن بیانی بن کو پترییا وان ئەدەبینە و خەلکەک مفای وەکی پێدڤی ژێ نابینت؟ چو پێنەڤێت، مە بڤێت نەڤێت مە کێماسی و شاشی د بیاڤێ نڤیسینێ و وەرگێڕانێ دا هەنە، هەتا نوکە چو ئالی خوە ب ناڤێ ئازادییا رۆژنامەڤانیێ لێ ناکەنە خودان، ژ بەر هندێ خەلکەک گازندەیان دکەت کو پرتووک و نڤیسارێن بادینی حەزا وان تێر ناکەن، ژ بەر هندێ پەنایێ بۆ پرتووکێن رۆشەنبیرییا خەلکەکێ دی دبەن.
ب دیتنا من ئەگەرێن وێ تێنەگەهشتنێ ژی بەهرا پتر دزڤڕنە نەبوونا زمانەکێ هەڤگرتی و نەشەهرەزایی د دبیاڤێن رێنڤیس و رێزمانێ و هونەرێ وەرگێڕانێ دا، زێدەباری چاڤلێکرن د وەرگێڕان و نڤیسینا پرتووکان دا ژ بۆ ئارمانجێن بازرگانی بێی کو لیژنێن تایەتمەندێن زمانی و هەلبژارتنا کوالیتییا پرتووکان ل سازییێن رۆشنبیری و کتێبخانەیان وەکی پێدڤی رۆلێ خوە ببینن کو هەر ئێکی مافێ وی بدەتێ.
