ناڤێ ب دورستی (ته‌حسین خیروللا عه‌بۆ) یه، ناسیاره ب (ته‌حسین ناڤشكی) ل زڤستانا سالا 1968 ل گوندێ ناڤشكێ، ل رۆژ ئاڤایێ باژێركێ مانگێشكێ نێزیكی سینۆرێ كوردستانا باكوور ژ دایك بوویه. خێزانداره و سه‌میانێ چوار كوڕ و كچه‌كانه. ل سالا 1974 ل ناڤبه‌را گوندێ ئۆزمانا و ناڤشكێ ده‌ست ب خواندنا خوه كرییه و د هه‌مان ده‌م ده؛ وه‌ك فه‌قه ل مزگه‌ڤتا گوندی خواندییه. خواندنا خوه یا ناڤنجی ل سالا 1983 ل ناڤبه‌را باژێڕكێ مانگێشكێ و باژێڕێ دهۆكێ ب داوی ئینایه. خواندنا مامۆستایه‌تییێ ل په‌یمانگه‌ها مامۆستایان ل سالا 1986 ل باژێڕێ دهۆكێ ب داوی ئینایه. ل سالا 2019 خواندنا خوە ل کۆلیژەیا پەروەردا بنیات – پشكا په‌روه‌رده و ده‌رووناسى ب دوماهی ئینایە، پشتى بهتر ژ 30 سالان ژ هه‌مان پشكا خواندنا بلند بێبه‌هربوویڵى ژ ئه‌نجامێ ده‌ستهه‌لاتا دكتاتۆرى یا حوكم هه‌تا سالا 2003 ل ئیراقێ دكر.
ل سالا 1985 كانییا وی یا ئه‌ده‌بی په‌قییه و ل ده‌ستپێكێ شعرا كلاسیكی نڤیسییه. ل قۆناغا به‌ری سه‌رهلدانا، ئێكه‌مین شعرا وی ل سالا 1989 ل رۆژنامه‌یا هاوكاری به‌لاڤبوویه. پشتی هینگێ به‌رهه‌مێن وی یێن شعری و ئه‌ده‌بی و ره‌وشه‌نبیری ل به‌لاڤۆكێن (به‌یان، بزاڤ، پاشكۆی ئیراق و به‌لاڤكۆكێن دن ) به‌لاڤبووینه.
پشتی سه‌رهلدانا گه‌لێ مه ل بهارا 1991 هه‌ر ل سه‌ر كارێ خوه یێ نڤیسكارییێ یێ به‌رده‌وامبوویه و به‌رهه‌مێن وی ل گه‌له‌ك به‌لاڤۆكێن هه‌رێما كوردستانێ وه‌ك: (په‌یمان، مه‌تین، نووخوازی، ریگای سۆسیالیزم، سه‌رهلدان، برایه‌تی، رامان، په‌یڤ، گازی، نووبوون، ئه‌ڤرۆ، به‌هدینان، چاڤدێر، هاوه‌لاتی، ئاوینه، هه‌رێم، سیلاڤ و رۆژنامه‌یا وار. هتد) به‌لاڤبووینه. نوكه ژی ئه‌ندامه د ئێكه‌تییا نڤیسه‌رێن- كورد دا-دهۆك. هه‌ر وه‌سا ئه‌ندامێ كارایه د رێكخراوا رۆژنامه‌ڤانێن كوردستانێ دا- زێده باری وه‌رگرتنا ئه‌ندامه‌تییێ د رێكخراوا رۆژنامه‌ڤانێن جیهانێ دا.
*یا هه‌ژی گۆتنێ یه، هه‌ر دگه‌ل نڤیسینا شعرێ ده‌ست ب نڤیسینا چیرۆكێ و بابه‌تێن رۆژنامه‌ڤانی ژی كرییه. هه‌ر وه‌سا بۆ ده‌مێ هه‌شت ساڵان وه‌ك په‌یامنێرێ هه‌فتینامه‌یا ((په‌یمان)) ل ده‌ڤه‌رێن مانگێشكێ و زاویته كار كرییه.
*ژ سالا 2007 هه‌یا سالا 2009 ئه‌ندامێ ده‌سته‌كا كوڤارا په‌یڤ بوویه. لسالا ل 1-10- 2009 دگه‌ل هنده‌ك هه‌ڤالان رۆژنامه‌یا وار وه‌ك ده‌ستپێكا كۆمپانیا پالۆ یا ره‌وشه‌نبیرى و راگه‌هاندنێ دامه‌زران و وه‌ك رێڤه‌به‌رێ نڤیسینێ هه‌تا ل 15-10-2015 رۆژنامه هاتییه گرتن لسه‌ر كارێ خوه به‌رده‌وام بوویه.
*نها ژى لسه‌ر كارێ خوه یێ نڤیسكاریێ و راگه‌هاندنێ ل تێلەڤزیۆنا پەروەردەیا دهۆک به‌رده‌وامه، پشتی 16 سالان کارێ مامۆستایێ ل هندەک قوتابخانەیێن بنەڕەتی کری و 12 سالان کارێ راگەهاندنێ ل پەروەردەیا رۆژئاڤا ل دهۆکێ کری.
*ل سالا 1999 ده‌ست ب نڤیسینا ئێكه‌مین رۆمانا هه‌ڤچه‌رخ ب ناڤێ (به‌هه‌شتا ئاگرى) كرییه. پرتووكێن وی یێن چاپكری هه‌تا نها ئه‌ڤه:
1-ڤه‌دانا پێلێن مژێ ڤه‌كۆلینێن وێژه‌یی ل سه‌ر توخمێ هه‌لبه‌ستا هه‌ڤچه‌رخ ل ده‌ڤه‌را به‌هدینان. ل سالا 2000 چاپبوویه.
2-چلخانه- شعر ل سالا 2002 چاپببویه.
3-خوه‌نیشاندانا قه‌رقۆدان- شعر ل سالا 2004 چاپبوویه.
4- ژانێن سیناهییێ- رۆمان ل سالا 2005 چاپبوویه.
5-چاڤێ سیتاڤكێ رۆمان- ل سالا 2007 چاپبوویه.
6-ده‌وله‌تا دارستانێ نۆڤلێت بۆ زارۆكان ل سالا 2008 چاپبوویه.
7-په‌ل و خولی رۆمان ل سالا 2009 چاپبوویه
8-ئالێ دی یێ پرێ، ڕۆمان ل سالا 2010 چاپبوویه
9-به‌هه‌شتا ئاگرى ل سالا 2011 چاپبوویه
10-تاڤگه یان لێگه‌رِیان ل رۆناهییا پرا جینۆتێ ل هه‌مان سالێ چاپ بوویه.
11-چاڤێ سێیێ- كورته چیرۆك -2013
12ـ دەولەتا ئیسرائیلێ، ژ نڤیسینا تیۆدۆر هرتزل، رۆمان، وەرگێڕان ژ زمانێ عەرەبی 2019 چاپبوویه.
13ـ ئیڤلین ـ رۆمان ـ 2020 .چاپ بوویە.
14-تاخێن خودێ – رۆمان. 2021 چاپ بوویە
15ـ گوڕلیس، رۆمان ل سالا 2022 چاپ بوویە.
16ـ ئەڤینی د فیشەکا بی کەی سی یێ دا، رۆمان، ل سالا 2022 چاپ بوویە.
17 ـ جوونێن هونەرێ ڤیانێ ـ ئێرێک فرۆم ـ وەرگێڕان، ل سالا 2023 چاپبوویە.
18 ـ ئەنتیجاش ـ ڕۆمان ـ ل سالا 2023 چاپبوویە.
19ـپەڕکانێ و گوستیرا ئەفریتی ـ شانۆنامە ـ ل سالا 2023 چاپبۆویە
نها كۆمه‌كا پرتووكێن دن هەنه ژ بوو چاپكرنێ به‌رهه‌ڤن، ژ وانا 3 رۆمانن ب شێواز و ناڤەرۆکێن نوو هاتینە نڤیسین.
20 ـ ڤیدا ـ ئەز ئەم ئەو ئەزم. ڕۆمان، ل سالا 2024 چاپ بوویە.
باشورێ کوردستانێ
22ـ 7ـ 2024 ـ
