بیرا من وەکی خەونێن شەڤان دهێت، دەمێ ل شۆڕشا کەوچەرینێ (ئیلۆلێ) بابۆ دچۆ ئەرکێ خوە یێ پێشمەرگەیێ د گەل هێزا هەلگۆردی، هندەک جاران مە پارەیەکێ کێم هەبوو، هندەک جاران ژی مە نەبوو. بابۆ بەری خواترخوازتنا چۆنا وەغەرا ب هەیڤان ڤەدکێشا، دا بێژت:
((بابۆ هەما بۆ خوە ئیدارە کن و بقەتین، هوین یێ وەزعی دبینن، سەورەیە و پارە نینە.))
وەک دیفاکتۆ، ل دووڤ گۆتنا بابۆی مە ژی وەک خەلکەکێ دی بۆ خوە ئیدارە دکر و دقەتاند. بەس قەتاندنەکا چەوا؟ ل وی دەمی پتریا خەلکێ گوندی فلسەک نەبوو. هەر ئێک ب کەدا دەستێن خوە و بەرهەمێ جۆتیاری و کیمجاران پالەتییا خوە د ژیا، سال دزڤڕی سالێ دەستەکی جلکان هەبوو یان نەبوو. تشتێ گەلەک خەلک پێدڤی دبوو، منەکا خوێ بوو و کیلۆیەکا شەکرێ بوو، خوە پێلاڤ ژی حاشای روویێ خواندەڤانی گەلەک جاران یێن خۆمالی بوون، یان وەکی رەحمەتی خدرۆی د پێخاسس بوون و ژیان هەر ب رێڤەدچۆ.
راستە ئەڤرۆ جودایە ژ دوهی و هەر ئێک کوڕێ زەمانێ خوەیە، لێ هندەک تشت راستینە، چ ئەڤرۆ بت چ دوهی بت، گەوهەێ وان ناهێتە گوهۆڕین. وەک مە گۆتی، دوهی نەبابۆیێ مالخۆیێ خێزانی ئەو پارە هەبوو خێزانێ خوە وەک مرۆڤان پێ خودان بکەت، نەبابۆیێ شۆڕشێ ئەو پارە ل بەر دەستی هەبوو موۆچەیێن باش بدەتە پێشمەرگێن ئەیلۆلێ کو خوە و زاڕۆکێن خوە پێ خودان بکەن، ژ بەر هندێ پترییا خەلکی یێ ب حالێ خوە رازیبوو و ب هەر رەنگێ هەی بۆ خوە دقەتاند. لێ ئەڤرۆکە، ئیراق ب هەرێمڤە ئەنجامێ سیستەمێ حوکمڕانییا سەقەت کەتییە د گەلەک قەیرانان دا و رۆژ بۆ رۆژێ کەمباخترە و پترییا خەلکی نەیێ رازییە و بەردەوام گازندەیان دکەن، چونکی هەکە بابۆیێن دوهی تنێ دو بابۆ بن بابۆیێ خێزانی و بابۆیێ شۆڕشێ، بابۆیێن ئەڤرۆ یێن خێزانی ب سەدان هزارانە و دەستەکێ ڤالایە و یێ دی چو تێدا نینە و شەرمێ ژ خێزانێ خوە دکەن. بەرانبەر، بابۆیێن شۆڕشێ ب هزارانە و پترییا وان دراڤ و سامانێ ڤی خەلکی ب رێکێن نەشەرعی شەفس کرییە و بۆ خوە حەلال کرییە و نێزیکی 30 سالانە، پارێزبەندییا حزبێ هەیە و ئێک ژی نەهاتییە سزادان. ئها ژ بەر هندێ دلێ خەلکی ژ پیرۆزیین وانێن نەتەوەی ژی ساربوویە و هەردەم رەخنەیێ و گازندەیان دکەن، لێ ئەو رەخنە و گازندە د کیستێ وان د مینن و بابۆیێن سەردەمێ فرۆشتنا پترۆلێ و کۆمپانیێن زەبەللاح و بازرگانییا سینۆربەزین موویەکی ژی ل خوە شاش ناکەن و گەلەک جاران خەلکێ ژ ئێشا لەشێ خوە دئاخڤن ب خائین و عیراقچی ژی ل قەلەم ددەن. ژ بەر هندێ وەلات یێ ژ گەنجان دهێتە بەردان و بابۆیێن وان ژی حەییری ماینە و کەس نزانت دێ چارەنڤیسێ وان چ لێ هێت.. پرسیارا ل ڤێرە دهێت: ئایا دێ هەر رەوش ب ڤی دەستوداری بت و گازندەیێن خەلکی دێ د کیستێ وان مینن یان بابۆیێن بووینە بازرگان و بزنسمان دێ وژدانا وان زندی بت و دێ ژ خەو رابن و پێداچۆنێ ب رەفتارێن خوە یێن بەرەڤاژی درووشمێن خوە یێن بریقەدار دا کەن و قەوارەیێ هەرێما ژ بەرئێک دچت رزگار کەن و بابۆیێن ب سەدان هزار خێزانان بەختەوەر کەن؟
