بەری چەند ڕۆژان، من کتێبا فیلۆسۆف، جڤاکناس و تیۆرڤانێ ئەدەبی یێ فرنسی، جان فرانسوا لیۆتار ب ناڤێ (بۆچی ئەم فیلۆسفیێ دکین؟) خواند. لیۆتار، وەک ئێکەمین ڕەوشەنبیرێ تیۆرڤان، تێرمێ (پشتی نووخوازییێ) ئینایی، ئەڤ کتێبە د چەند سەمیناران دا ل سالا 1964 پێشکێشی قوتابییێن خوە یێن قووناغا ئێکێ ل زانینگەها سۆربۆنێ کریە.. وەسا دیارە، نڤیسەری د ڤێ کتێبێ دا بزاڤ کریە کو ب ڕۆهنی و کورت و کرمانجی هزرێن خوە یێن فیلۆسۆفی یا پشتی نوخوازییێ (پۆست مۆدرێنیزم)ێ داڕێژت. د هەمان دەمی دا، ناڤبری گرنگییا تێهزرینەکا کوور د تیۆریکرنا خوە دا کریە و شرۆڤەکریە کو ئەم فیلۆسۆفییێ د جیهانەکا وەسا دا بکین، دبت مرۆڤی باوەری پێ نەیی، ڤەدەر کری ژ واقعی و دەم ب سەرڤەچۆیە. کورتیا وان سەمیناران د سەر قەلەمکێن خوارێ دا دیار دبت:
*د سەمینارا ئێکێ دا، لیۆتار، سیمایێن گشتی یێن فیلۆسۆفییا پلۆتۆی، برۆست و لیۆکانی ب پەیڤان خواندنەکا دی ددتێ و ڕۆهن دکت، فیلۆسۆفی ب پلەیا ئێکێ د گەوهەری خوە دا، حەز و مەرەقا هندەک مرۆڤانە دا کو خودان پێ بگەهتە پەند و زانین و ڕاستی و دورستیا گەوهەرێ تشتی و کەسێ دی د گەردوونا بەردڕیایی دا.
* د سەمینارا دویێ دا، لیۆتار بەحسێ فیلۆسۆفی یا هیراکلیتسی و هیگلی دکت و هەبوونا پەیوەندییا کوور د ناڤ بەرا تێگەهێ فیلۆسۆفییێ و دیرۆکێ دا شرڤە دکت و دگەهتە وی ئەنجامی کو هەردو ئالی خوەدەیێ پەیدابوونا (قەلەقێ) دلڤینت.
* د سەمینارا سێیێ دا، لیۆتار دپرست و شرۆڤە دکت، فیلۆسۆفی فۆرمەکە ژ فۆرمێن دەربڕینێ کو لڤینەکا بەردەوامە و نەئێکسەرە د دەمەکی دا.
* سەمینارا دووماهییێ لیۆتارێ فیلۆسۆف بەحسێ فیلۆسۆفییا مارکسی دکت و ئاشکرا دکت کو وی شیانێن فیلۆسۆفییێ ب کریار دجیهانێ دا گوهۆڕینە.
پرس ئەوە: ئەرێ چەند ژ مە فیلۆسۆفییێ، ل پەی نێڕینا لیۆتاری، وەک مەرەق دخوینن، دا کو دەرگەهێ هزرێن خوە بۆ ئاسۆیێن گەوهەرێ سرۆشت، هەبوونێ، سیاسەتێ، مەعریفەیێ و جوانییا د گەردۆنێ دا ڤەکت و بەرسڤا ئارەستەکرنا پرسیاران هەر پرسیاران ئاراستە بکت؟
