گەلەک جارا خوینەرێن ڕۆمانێن من وەسا بەحس دکن کو ڕۆمانێن من بخوە تێکستێن سیناریۆیانە و تیمێ سینەما و درامایێ گەلەک زەحمەتێ پێ ڤە نابینن، دەمێ بۆ کارەکی درامایی یان سینەمایی ڤەدگوهێزن.
ئها ژ ڤی پیڤکی (منطلق)ی، پشتی خوینەرێ کتێبێ ل وەلاتێ مە، پتر ب ئەگەرێ ئەنترنێتێ و سۆشیالێ بەرەف کێمبوونێ ڤە چۆیی، من هزر د نڤیسینا تێکستێن سیناریۆیێ ژی دا کر کو هندەک ژ بابەتێن ئەدەبی وەک سیناریۆ بنڤیسم. هەلبەت من ئەڤ پێنگاڤە ژ بووشایێ نەهاڤێتیە، دیرۆکا وێ بۆ بەری دو سالان دزڤڕت، پشتی بەری هینگێ ب چەند سالان، من گەلەک ل سەر نڤیسینا سیناریۆیێ خواندی و ب ناڤ جیهانا ئەنترنێتی ڤە چۆیم، تایبەت کتێبا ((سیناریۆ)) یا نڤیسەرێ ناڤدار جیهانی ((سید فیلد))ی من پتر ژ جارەکێ خواندی.
پشتی بەری دو سالان من پێنگاڤا ئێکێ هاڤێتی و سیناریۆیا خوە یا ئێکێ یا ژ 32 خەلەکان پێک دهێت ب ناڤێ ((جەگەر و ڕۆندک)) نڤیسی، من هزر د بەلاڤکرنێ دا کر.. ل دەستپێکێ، من پەیوەندی ب تیڤییەکا ناڤدارا دهۆکێ کر و دو خەلەکە ژ درامایێ، ل گەل کورتییەک ژ چیرۆکا درامایێ و لیستێ کارەکتەران، بۆ هەلسەنگاندنێ ڕادەستی وان کرن.
پشتی ب هەڤکارییا بەرهەمهێنەرەکێ ناڤدارێ هونەرێ سینەما و درامایێ ل دهۆکێ، ئەم و ستافێ کاری یێ وێ تی ڤی یێ روونشتین و پرۆپۆزەل ل گەل هەر 32 خەلەکان من پێشکێش کرین، ل دەستپێکێ تی ڤی ڕازی بوو کو پشتی خواندنا تێکستی و چارەکرنا دارایی گرێبەستێ ئیمزا کین و کێموکاسیێن هەین چارە کن و درامایێ وێنە کن.
چیرۆک گەلەک یا درێژە، وەلحاسل، پشتی پتر ژ سێ هەیڤان ئەز چاڤەڕێی بەرسڤێ مایم، چو بەرسڤێن لۆژیکی ژ وی دەزگای نەگەهشتن… دووماهییێ گومان بۆ من چێ بوو کو سوحبەت یا سافی نینە، ئەز ئێکسەر چۆمە دەف بەرپرسێ ئێکێ یێ وی دەزگای، ئەوا من هزر کری کۆ لژنەکا تایبەت دێ ل وی زڕە دەزگەهێ ڕاگەهاندنێ یێ حزبی هەبت و دێ تێکستێ درامایا من ب دیتنەک ئەکادمی و بابەتی هەلسەنگینن و تێدیتنێن خوە دیار کن و دێ گەنگەشەیێ ل سەر کین. مخابن، پاشی دیار بوو کو ئەو ب تنێ خەیالا من بوو، ڕاستییا وێ دەرکەت کەسەکێ ب ناڤ بسپۆر و خودان شیان، دو خەلەکێن من ژ سیناریۆیێ ڕادەستی وی دەزگایی کرین، یێن ڕادەستی وی کەسێ ب ناڤ (خەبیر) کرین، بێی کو ئەو بخوینت، دراما هەمی، ل دەف خوە (تەقیم) کریە و بڕیارا خوە یا تاک لایەن دایە و پەسەند نەکریە.. تێبینییا دگەل ڤی پوستی دا، وەک هامش ل سەر نڤیسییە کو ئەڤ سیناریۆیە ژ بەر گەلەک ئەکتەران و مەزاختنا زێدە یا پارەی بۆ فلمەکی یا باشە و بکێر درامایێ ناهێت. پشتی من دووڤچۆن کری، دەرکەت وی کەسی نە 32 دو خەلەکێن دراما من نەخواندینە، یا دورست هەردو خەلەکێن بۆ هەلسەنگاندنێ من داینە ڤێ نەخواندینە و تێبینیەکا بچووک ل سەر نڤیسیە و هاڤێتییە د چەکمەچییا مێزا خوە دا، هەتا ئەز ل دووڤ چۆیم پشتی سێ هەیڤان ژ نوو ڕادەستی من کر.
پشتی هینگێ من پەیوەندی ب بەرپرسێ دەزگایەکێ دی یێ ڕاگەهاندنێ ل دهۆکێ کر کو وی ببینم و سەبارەت هندک بابەتێن ڕەوشەنبیری و هونەری د خزمەتا گشتی دا باخڤین. وی بەرپرسی ل دەستپێکێ بەرسڤا من ب ئەرێنی دا. پشتی هینگێ من گەلەک بزاڤ کرن کو وی ببینم، سەرەڕایی دانا ژڤانی پتر ژ جارەکێ لێ ئەز نەشیام جەنابێ وی ببینم و هەر جارێ هێجەتەک دگرت. دووماهییێ من ڕێڤەبەرێ تێلڤزیۆنا وی دیت و ئەم پێک ڤە ڕوونشین. لێ مخابن وی ڕێڤەبەری ژی نەدەنگ بوو و نەڕەنگ بوو و ب تنێ کورسیکەک مەحتل کربوو. ب هەر رەنگێ هەیی، وێ تلڤزیۆنێ ژی دو خەلەکە بۆ هەلسەنگاندنا دەستپێکی ژ من وەرگرتن.. مخابن، سال زڤڕی سالێ خوە وان بەرسڤا من ژی هەتا نوکە نەدایە و بابەت پشتگوهـ کریە.. پاشی من پەیوەندی ب هندەک هەڤال و برادەرێن خودان شیان و نێزیکی حزبێ کر و ژێ خواست کو ڕێکەکێ ببینن د بەرژەوەندییا مە هەمییان دا بت دا کو ڤێ سیناریۆیا ئەکادمی، وەک کارەک درامایی و پرۆفیشنال پێشکێش کین. دێ جارەکا دی بێژم: مخابن هەتا نوکە نە ب ئەرێ و نە ب نەرێ من چو بەرسڤ ژ وان برادەران ژی وەرنەگرتینە.
هەڤالان، بابەت یێ دێژە و ب نڤیسنەکا سۆشیالێ ب دووماهی نائێت. تشتی باش ڤێ ڕەوشا نەرێنی و پاوانخوازیییا کەسۆکی د هندەک سازییێن ڕاگەهاندنا حزبی و سیبەر حزبییا هەرێمێ دا، کارتێکرنەکا وەسا ل من نەکر کو ئەز دەست ژ نڤیسینا سیناریۆیێ بەردم، بەرۆڤاژی ئیرادەیا وەسا بۆ من چێ کر کو پتر ل سەر کارێ خوە ڕژد ببن، من باوەرییا هەیی دێ هەر ڕۆژەک هێت بەرهەمێن من یێن داهێنانی ڕۆناهییێ ببینن. تشتێ باش، ژ پار وەرە من سیناریۆیەکا دی دەربارەی ئەنفالێن ڕەش، ب ناڤێ (چۆلی و قیامە) نڤیسی و ل ڤێ دووماهییێ من ئەو ژی ب دووماهی ئینا، نوکە ئەو ژی یا بەرهەڤە، هەکە ئالییەک هەبت پێک بهێین بهێتە هەلسەنگاندن و وێنەکرن و پێشکێش کرن.. د ڕۆژێن بهێن دا، دێ چەند دیمەنەکا ژ وێ سیناریۆیا ل سەر ئەنفالێن ڕەش من نڤیسی دێ بەلاڤ کم.. دووماهییێ دێ بێژم: هندی ئەز یێ ساخبم، کریارا نڤیسینێ دێ ل دەف من بەردەوام بت و ڕاناوەستت.
