پیسترین کۆلتۆر ژ رژێمێن دکتاتۆریێن داگیرکەرێن کوردستانل بۆ هەرێمێ هێلای کولتۆرێ قەدەغەکرنا خڕڤەبوون و خوەنیشاندانێن خوەرسکیێن جەماوەرییە، ژ بەر کو ئارمانجا سەرەکییا دکتاتۆران، تایبەت بەعسیان هەر ئەو بوویە کو تاکی ب جڤاکڤە بکت کۆیلە و رەشا ئاغاتیا خوە نیشا هەر یاخیبوویەکی بدەت. باش ل بیرا نفشێ سالێن حەفتیان و هێرڤە مایە، دەمێ هەر کەسێ بەرامبەر زولم و زۆرداریا بەعسیان خوەنیشاندان کربانە یان خڕڤەبوونەک جەماوەری کربایە، بێ دوودلی ب ئاگری و ئاسنی ب دوماهی دهینا و تنێ فەرمانا هەر خوە نیشاندانەکێ د دەست وان دا بوویە، هەلبەت ئەوژی ئەو خوەنیشاندان بوون، تنێ د بەرژەوەندیا رژێما دکتاتۆری دا بووینە، ل ژێر درووشمێن: ((امە عربیە واحدە ذات رسالةخالدة))، ((یحیی البعث)) ((اذا قال صدام قال العراق)) … هتد. هەلبەت ئەوێ پشکداری تێدا نەکربایە، تایبەت توێژا مووچەخۆر و خویندەکاران گەف لێ دهاتنە کرن.
راستە کۆلتۆرێ قەدەغەکرنا خڕڤە بوون و خوەنیشاندانێن جەماوەری بێی دەستووریا دەستهەلاتێ ل سەر دەمێ حوکمەتا هەرێمێ ژی هێشتا مایە، لێ ژ دەڤەرەکێ بۆ دەڤەرەکێ ب رێژەیی جودایە و دوماهیێ کرنا هەر خوەنیشاندانەکێ ل دووڤ هشیاری و ئیرادەیا خەلکێ هەر دەڤەرەکێ دمینت. واتە هشیاری و ئیرادەیا خەلکێ سلێمانیێ، ژ هشیاری و ئیرادەیا دەڤەرێن هەولێرێ و دهۆک جودایە.
ئەڤ رەوشا هەیی ل سەرانسەری پارچەیێن دی یێن کوردستانێ ژی دیسا ب رێژەیی هەیە، بێدەنگیا پارچەیێن دن یێن کوردستانێ، تایبەت کوردستانا باکوور، وەک مەزنترین پارچەیا کوردستانێ دیار دکەت کو ماف دهێن ستاندن و ناهێنە دان. ژ بەر هندێ ئەمێ دبینین ژ بەر کو خەلکێ مە پڕانیا وان نەرەوشەنبیریا خوەنیشاندانێن مەدەنی هەیە و نە ئەو وێرەکی و خوە راگری هەیە، همبەر دەستهەلاتێ رابن سەرخوە و خوەنیشاندانەکا ملیونی بکەن دا کو گڤاشتنێ ل سەر رایا گشتی یا جیهانی بکەن داکو دەنگێ خوە بکریار بۆ کارەساتا نها ب سەرێ کوردێن روژئاڤا دهێت دژی ترکیا داگیرکەر بلند بکەن و سنوورەکی بۆ زۆرداریا وێ دانن.
هەلبەت ژ بەر وان ناکۆکیێن ئایدیۆلۆژی د ناڤبەرا پڕانیا پارتێن هەرێما کوردستانێ و پارتێن هزر مارکسیێن رۆژئاڤا و باکوورێ کوردستانێ دا، د بەرژەوەندیا دەستهەلاتێ ژی دا نینە کو پشتەڤانیا خوە بۆ خوەنیشاندانەکا جەماوەری یا بەفرەهـ بکەن، ترس ژ هندێیە کو بهێت سیاسەتکرن ژ ئالیێ نەحەز و نەیارانڤە. ژ ئالیەکێ دی ترسا مەزن ئەوە کو ئەردۆگان دیسا مینا رۆژانێن ریفراندۆمێ بئنڕت و گەفان ل هەرێما کوردستانێ ژی بکەت. ژ بەر هندێ ژ بلی لایەنگری و کەلا عاتیفەیا نەتەوەیی، دەستهەلاتا هەرێمێ و هەتا قەندیلی و پارچەیێن دن یێن کوردستانێ ژی چو تشت ب کریار پێ چێنابت بۆ رۆژ ئاڤا و چو پارچەیێن دن یێن کوردستانێ بکەن، مینا کەسێ چو پێ چێنەبووی ل کۆچا ملیۆنی یا سالا1991 بۆ باشوورێ کوردستانێ بکەت.
واتە مژار بوویە دیفاکتۆیێ ((رەشو ب دەستێ خوە هەکە ئاڤێ تو بری)) و ئوو ئەڤا پڕانیا خەلکێ مە ژ دلسۆزیا خوە نها ب رێکا میدیا و سۆشیال میدیا دکەن ژی، باوەرکەن تنێ ئاخڤتنە و دێ بتە تشتەک ژ مێژوویا ژبیرکری و دەمەکی نێزیک دێ دیار بت کو تنێ هێز، شیان و بەرژەوەندی د ژیوارێ ئەڤرۆ دا دئاخڤن، وەک ناپلیۆنی گۆتی:(( تۆپا کێ مەزنترە ئەو دی بسەرکەڤت))
