عوسمان ئەرتغرلێ ئێکێ، ژ بەگێن عەشیرەکا مەغۆلیان، بەری سەدان سالان ب ئەشیرەتا خوەڤە مشەختە بوویە ئاخا تورکیا نها و وەک مێرنشینەکا سەلۆجۆقی دگەل ئمپراتۆریا رۆمێ، شیان ببنە ئمبراتۆری بۆ خوە مفای ژ دینێ ئیسلامێ وەربگرن، پشتی ئیمامێ حەنەفی فەتوایەک دای کو مەرج نینە هەر و هەر مالباتا قورەیشی و خەلیفێن رەگەز ئەرەب خیلافەتا ئیسلامێ بکەن، ئها ب وێ فەتوایێ حوکمێ خیلافەتا ئیسلامێ نێزیکی 600 سالان بێ هەڤڕک پاوان کر. ژ هینگێ وەرە هەتا نها دەولەتا تورکیا، ب هەمان کولتۆرێ کەڤنێ کوشتن و تالانکرنا گەلێن لاواز مینا کوردان قڕدکەت و چو ئالی نینن هێرشێن وان براوەستینن.
هەژی بیرئینانێیە کو سەددام حسێنی ژی ل ژێر سیبەرا ئایاتێن قورئانا پیرۆز مللەتێ کورد ئەنفال و کیمیاباران کر، ئیمام خومەینی ژی ب هەمان رۆحیەتا مەزهەبێ شیعیێ سماهیلێ سەفەوی هیلاکا کوردان راکر. داعشێ ب هەمان شەریعەتێ دارستانێ رەفتار دگەل مللەتێ کورد، تایبەت ئیزدیان کر.. واتە ترک و عەرەب و عەجەمان ل بن سیبەرا فەتوایێن زانا و مەزهەبێن دینی ئیسلامێ، کوردان و نەتەوەیێن دی قڕ دکەن. بەرامبەر، کورد هەرتم یێ خوە دهێلنە ب هیڤیا رەحما وی دینیڤە یێ کو ل بن ئالای وی قوتبڕینا وان دهینن و دوعا ژ خودای دکەن کو وان ژ دەستێن هۆڤێن داگیرکەر رزگار بکەن، لێ هەر کوردێن دبنە قوربان و داگیرکەر پتر یێ زیانێ دگەهیننە خەلکێ بێ دەستهەلات و جڤاکێ نێڤدەولەتی ژی وەک پێدڤی هەلوەست نینە کو هێرشێن هۆڤانە یێن دژمنان راوەستینن، تایبەت ترکیا کو نها مەزنترین هێرشا کۆمکوژیێ ل بن ئالایێ هەیڤ و ستێرێن خویناوی دکەتە سەر گوند و باژارێن کوردستانا رۆژئاڤا و کەس د هەوارێ ناچت.
ل ڤێرە دۆ خال دهێنە بەرچاڤ، یا ئێکێ: رەنگە بسورمانەتیا کوردان نەیا ژدلە و روومەتیە، رۆحا جیهادێ د دلێ وان دا نەچاندیە دا کو بەرگیریێ ژ ئاخ و ملک و شەرەف و نامووسێن خوە بکەن، ژ بەر هندێ خودێ د هەوارێ ناهێت. یا دووێ: کوردان هەر د ئەزەل دا هەڤگرتن نەبوویە و گۆتنا پێشیان: ((ژ تە حەرەکەت ژ من بەرەکەت)) ناکەنە کریار بەرامبەر دژمن و داگیرکەران، ژ بەر هندێ هەر تەپەسەر و بن دەست ماینە. ئەڤە وەک گریمان، دبت گەلەک ئەگەرێن دن هەبن، شارەزا و ڤەکۆلەران بەرچاڤکرنە، لێ چارە هەتا نها بۆ نەهاتیە دیتن. لێ هەر چ ئەگەرێن دی هەبن، مفا وەرنەگرتن ژ دینێ ئیسلامێ دخزمەتا سیاسەتا نەتەوەیی دا دێ ئێک ژ وان ئەگەرێن سەرەکی بت.
