د درێژاهییا دیرۆکێ دا، تەکەکەسی کورد، وەکی هەر تەکەکەسکێ دیندارێ ڕۆژهەلاتا مەزن، ب تنێ ڕێژەیا سپی ژ ڕەوشەنبیرییا دین و مەزهەبێن خوە وەرگرتیە و ل گەل زاکێ دایکێ پێ هاتیە فرشک کرن و مەژییێ وی پێ بەرمەجە بوویه و د سەری دا مکوم (راسخ) بوویە. د مەنزۆمەیا گشتی یا هەر جڤاکەکی دا، تێخەبتینا وێ ڕەوشەنبیرییا ڕەهایی و ئێکلایەنی د ناخێ وی دا کو ب خوەدیێ ئاخرەتا وی یا ئەبەدی ڤە گرێ دایە، گەلەک یا ب زەحمەتە، هەکە نەبێژین موستەحیلە.
پشتی سنۆربەزینا شۆڕەشا تەکنەلۆژی و جیهان بوویە قالبێ مۆبایلێ د بەریکێن مە دا، هشیاربوونا خەلکی، ژ دایکبوونا نفشێ سێیێ و دیاربوونا رەش و سپیێن وێ مەنزۆمەیا ب ڕەهایی پیرۆز، ئەو تشتێ زەلامدینێن دینداران ئێک بۆ ئێکی ژ خەلکی ڤەشارتی دیار بوون کو ئەوا د سەری دا مکوم بوویی ڕەهاییە جهێ گومانێ یە و حەقیقەتا وێ وەک هەر تشتەکی ڕێژەییە. واتە گەوهەرێ وێ ڕەوشنبیرییێ رەش و سپی یە. ڤێجا دەمێ ئەو ڕاستی ب هەردو ئالییێن هەڤکێشێ دئیتە گۆتن، شۆک (صدمة) بۆ باوەردارێن هەر دین و مەزهەبەکی چێ دبت و ئەو ب چو ڕەنگان باوەرنا کن کو هەر تشتەکێ د گەردوونێ دا هەیی حەقیقەتا وی ڕێژەیی یە و چو تشتێ ڕەهایی نینە. ڤێجا دەمێ ل پیرۆزییێن هەر دین و مەزهەبەکی دهێتە دانێ، دیندار و ئۆلدارێن جڤاکی ئێکسەر ب هزرەکا دەمارگیر و دژوارخوازی رەفتارێ ل گەل روودانێ دکن و بەرگرییێ ژ پرنسیپ و باوەرداریێن خوە یێن پیرۆز دکن، بێی کو بزانن گەوهەرێ وێ یێ حەقیقی چ یە و داگێڕانێ ب چو ڕەنگا ناکن.
د سەر هندێ ڕا، دەمێ مرۆڤ ب پیڤەرێن ئەکادمی و لۆژیکی ل کێشەیێ تەماشە کت، مرۆڤ نەشێت وان دینداران نەهەق ل قەلەم بدت، وەک مە ل سەری بەحس کری، چونکی هێشتا سۆرێن ساڤا دایک و بابان و جڤاکی ئەو پیرۆزی د سەری دا چاندینە.
هەلبەت، هندی خەلک رەش و سپییێن ئایدیۆلۆژییێن پیرۆز د ناڤ جڤاکێ مە دا، ل دووڤ وان ژێدەرێن دیرۆکی یێن هەین و خویانی و بیانییان بەحس کرین نەخوینت و ب هشیاری و ب ئیرادە بڕیارا خوە نەدت، ئەڤ ڕەوشا هەلچۆن و دەمارگیری د ناڤبرا دین و مەزهەب و تائیفەیان دا دێ بەردەوام بت و تەڤ باوەردارێن دین و مەزهەبان دێ د بازنەیەکێ ڤالا دا زڤڕن و خالێن دەستپێکێ و دووماهییێ ژێک ناسنا کن و ب تنێ بەرژەوەندخواز و بازرگانێن بەنج کرن و نڤاندنا جڤاکی دێ مفادار بن.
