((بۆ هەر سەرکردەکێ کوردی، ب شەڤ کوورهەی ل دیرۆکی دنێڕت دیاریە)).
تو ب تنێ بووی ل گوندێ ئەفسانەیێ بوویە تەپکەکا شیشەی و تە جانیکەک ماهینا سەگلاوی ل نک دلێ خوە خودان کر داکو خەون و مرادێن تە بجهبینت کو رۆژەک بهێت تو ل وێ جانیکێ سواربی، مینا گەلەک سواران بگەهیە سەرێ گرێ مرادان و پارچە پەڕۆکێ پیرۆز لێ بچکلینی و فلیێ دیرۆکی ب ناڤێ خوە دامزرینی. لێ نە ئەو جهێ تە جانیکا ماهینێ لێ خودان دکر جهـەک گونجای بوو، نە خودانێن هەسپ و ماهینێن دی رێک دا تە تو ژی مینا وان مافێ خوە وەربگری و ل جانیکێ سوار ببی و خوە بگەهینی کولۆمتێ مرادان و خەونا خەونان بکەیە راستی.
،،،
هەیڤ هاتن و سال بوون کاروانی و رۆژەکێ تە پەڕێن خوە قژ کرن و ناڤچاڤێن تە ئاگر ژێ پەشی و تە رکمانیا هەمی ئاستەنگان کر و تە بێ زین و پاشە زینک خوە هاڤێتە سەر پشتا جانیکا ماهینێ و بێ رکێب پێن خوە ل بن زکێ وێ دان و نەدان، ئێکسەر گاماسی و نەهنگ د بنێ ئەقیانۆسان دا بێهنژین و هۆڤێن حەفت سەر ل پشتا چیایێ قافێ گڕنژین و هلما وان تو هنگافتی و ڤێجا تە خوە نەدیت، هێشتا ل بنێ کولۆمتێ مرادان جانیکا ماهینێ شەمبۆز بوو و زێچ
