هەکە تو ل فەرهەنگا زمانێ پشکدارێن تۆڕێن جڤاکی سەکحی، رنگە بۆ تە دیاربت کو چو پەیڤ تەمەت هەردو پەیڤێن خائین و مەلاق ل ڤێ دوماهیێ ژ ئالیێ کادرێن ئەلهۆیێن حزبێن هەرێمێ دژی هەڤدو نەهاتینە بکارئینان، ئەڤ هەردو پەیڤە ژی دەربرینی ژ دۆخەکێ دەروونی یێ نەئارام و شەپرزە دکەن ل جەم تاک و جڤاکێ هەرێمی و رۆلێ ئەقلی تێدا کێمە و هەر دەمەکی کارتێرنا ڤان هەردو پەڤان دئارادانە رەوشێ بەرەڤ کامباختر ببن و وەلاتی تووشی سەربارکێن مەزنتر بکن. ژبەر کو شەڕە دەڤ گەلەک جاران پێشەکیا لێکدانێ و شەڕێ سینگ و سینگانێیە، بیێ کو هزر د هەڤسەنگیا هەڤکێشا هێزێ دا بهێت کرن، ژبەرکو دەروونا تووڕە و تنگژی هەناسەیا کەربا براکوژ دئازرینت. ئەڤە گەلەک جارا د دیرۆکا کوردستانێ دا دوبارە بوویە.
هەلبەت زمانێ لۆژیکی د ئاراستەکرنا ڤان جۆرە پەیڤان دا گەلەکێ لاوازە، ژ بەرکو پەیاما وان پەیامەک رەهاییە و دیتنا رێژەی تێدا رۆلێ خوە نابینت. وەکی دیار د لۆژیکی ئەکادمی دا رۆلێ رێژەیێ د دیاردە و گوهۆڕینەران دا ل کارە و رۆلێ رەهایی رۆلەک کلاسیکیە و دانپێ ناهێتە دانێ.
پرسیارێن ل ڤێرە خوە دسەپینن، ئەرێ هەر کەسێ باوەری ب ئایدیۆلۆجیایەکێ هەیی مەلاقە؟ ئەرێ هەر کەسەک راست باخڤت و ئەقلێ ئەفسانەیی رەتکەت و راستێی بەرانبەر خەلەتیا حزبەکێ یان بەرپرسەکی بێژت خائینە؟ ئەرێ هەر کەسێ بێدەنگ ما و بۆچۆنا خوە دیار نەکر نەوێرەکە و ژ هەژی ژیانێ نینە؟ رەنگە هەر ئێکی ژ مە بهتر ژ بەرسڤەکێ بۆ ڤان جۆرە پرسیاران هەنە.
هەر چاوا بت ب زمانێ سەردەم رەتکرنا یێدی تنێ برینی کوورتر لێ دکت و سەربارکێن نەرێنی دگەل خوە دهینت. ل ڤێرە باشتر ئەوە کو بەری هەر تشتەکی بزاڤا نەهێلانا کولتۆرێ ڤان جۆرە پەیڤێن زڤر بهێت کرن د ناڤ ئەدەبیاتێن حزبێن کوردی دا، دا کو خوەش کولتۆرێ کۆمرەشیێ و دوبەرەکیێ و هەڤدو شکاندنێ رزگاربکن و ب زمانی شارستانی دایلۆکێ بکن و مل ب ملی گەلێن جیهانێ بەرەڤ ئاسۆیا رۆهن کاروانێ پێشکەڤتنێ بهاژۆن، ئەڤە ژی ب ئالیەکی تنێ نابت هەکە هەر ئالیەک ژ دەڤ خوە دەستپێشخەریا مرۆڤایەتی نەکەت و دەستێ براینیێ بۆ هەڤڕکێ خوە درێژ نەکەت.
