((ئەی برتوس، هەتا تو ژی…))
دەستەواژەیا ل سلال مە دیار کری، گۆتنەکا ناڤدارا لاتینیە Et tu, Brute ژ شانۆگەرییا شکسپیری یا ناڤدار ب سەرناڤێ {یۆلیۆس قەیسەر} دەربارەی خیانەتا هەڤالینییێ مە کرییە دەستپێکا بابەبەتێ خوە، دەمێ دکتاتۆرێ رۆمانی یۆلیۆس قەیسەر، د کۆدەتایا کۆشتنا خوەدا دا وێ ئاخفتنێ ئاراستەی هەڤالێ خوە یێ وەفادار مارکۆس جونیۆس برتوس دکەت، یێ کو وی باوەر ژ چاڤێن خوە نەکری ئەو هەڤالێ وی دێ پشکدارییێ د وێ کۆدەتایێ دا کەت! ئانکۆ، خیانەت و چەتەیی دو پەیڤێن هەڤالجێمکن و ژێکجودا نابن و دبت دیرۆکا پەیدابوونا چەتەی ب کێمی بۆ بەریا پتر ژ سێ هزار سالان ل وەلاتێن مسرێ و یۆنانێ و ئیرانێ دڤزڕت، هەتا نها تایبەت دناڤ کوردێن پارچەپارچە کری دا ب دەستێن دژمنێن هەڤدو بەردەوامە.
وەسا دیارە چەتەیی ژی بەرهەمێ پێشکەڤتنا ئەقلێ مرۆڤی و جودا ژ ئەقلێ گیانەوەران بوویە، لایەنێن داگیرکەر و زلهێز ل وەلاتێن وەک کوردستانێ رەوشا وان ئالۆز بۆ خوە چەتەیان دژی برایێن وان دگرن ولایەنێ دبتە چەتە و داردەستێ وی ئالیێ ب هێز سەخمەرات تێرکرنا خورسکان (غریزە)یان لسەر حسێبا پرنسیپ و بهانەیێن خوە یێن ئەخلاقی. هەلبەت کورد د دراژاهییا دیرۆکێ دا ژ ڤان هەردو ساخلەتێن کرێتێن جڤاکی بێ بەهر نەبووینە.
هەکە ئەم ب وژدان باخڤین، دبت فاکتەرێن سەرەکیێن خیانەت و دووڤەلانکیا کوردان بەهرا پتر بۆ جهێ جیۆگرافیێ کوردستانێ و حەزژێکرنا زێدە یا تاکێ کوردی بۆ مالێ دونیایێ دزڤڕت کو رەخوروویێن وێ هەموو دەولەتێن داگیرکەرن و چو دراوسیێن بێ لایەن نینن و هەردەم تنێ چیا بووینە هەڤالێن گرۆپێن یاخیبووین، هەکە داگیرکەرێن پارچێن دی یێن کوردستانێ ژی پشتەڤانییا وان بکەن، درووشمێن ئازادییێ و دەولەتا خەون بلند کرینە.
ب گۆرەی ڤی واقعێ هەیی، هەکە ئەم ئەرشیفێ دیرۆکا خەبات و تێکۆشینا کوردان گۆرەی وان قەلەمێن بێ لایەن نڤیسی ڤەکەین، ب کێمی پشتی کوردستان ل سەدی شازدێ زاینی، ل ناڤبەرا سەفەوی و عوسمانیان دو پارچەبووی و رۆلێ مەلا ئدریسێ بەدلیسی یێ رازیکرنا میرێن مێرنشینێن کوردی بۆ خزمەتکرنا ئۆسمانییان تێدا دیار ڤەکەین دێ بۆ مە دیار بت کو چو ئالیێن سیاسی یێن کوردی ل هەر چار پارچەیێن کوردستانێ نەماینە چەتەیی و خیانەت دژی نفشێ خوە نەکری. خالا بالکێش ئەوە هەر ئالییەک هەر دەم هێجەتان بۆ خوە دگرت و خیانەت و چەتەیا خوە وەک خالەک سەرەکی ژ تاکتیک و ستراتیجیکا خوە یا گەهشتنا ئارمانجێن نەتەوەیی بۆ خوە حەلال دکەت و چو ئالی دانپێدانێ ب ماستێ خوە یێ ترش ناکەن، ئانکو هەر ئالیەک ئالیێ دی ب خیانەتێ و چەتەیێ تاوانبار دکەت و خوە مافدار و خودان رێکا پیرۆزا کوردینیێ ل قەلەم ددەت.
