هزرڤانێ ئەمریکی(( ئالفێن توفلێر)) د تیۆریا خوە دا، دەربارەی سەنگا دەستهەلاتێ و هەبوونا دەولەتا ب هێز د پرتووکا خوە یا ناڤدار دا ب سەرناڤێ ((ڤەگوهازتنا دەستهەلاتێ))) وەسا دیار دکەت کو نهێنيیا وەلاتێ وی وەک ب هێزترین دەستهەلاتا خودان سازیێن پێشکەفتی ل جیهانێ بۆ فاکتەرێن هەبوونا هەڤکێشا ژ (مەعریفەـ هێز ـ سامان) پێک دهێت دزڤڕت. ئانکو گەلێ ئەمریکا شیا دەولەت سەرێ {مەعریفێ، هێزێ و پارەی} ببتە سەرکێشێن جیهانێ و بڕیارێن ڤەبڕ بدت و فەرمانا خوە ل سەر هەر تشتەکی بسەپینت.
هەلبەت ل هەر وەلاتەکی سیستەمێ سازیێن وی تەکنۆکرات بن، گرنگ ژێبوونا نەتەوەیی بت و سیستەمێ حزبێ هند ل دەف وان نە یێ ب هێز بت، واتە کی ب کێر بهێت و خودان باوەرنامە و شیان بت و ژێبوونا وی ب پلەیا ئێکێ بۆ وەلاتێ ئەمریکا بت ئەو دێ خودان کورسی بت. مەبەستا من ژ ڤێ گۆتنێ ئەو نینە کو ئەز هەڤبەرکرنێ دگەل وەلاتەکی وەک ئەمریکا و ئیراقێ و کوردستانێ بکم، رەنگە پتر مەرەما من ژیوارێ ئیراقێ ب گشتی و کوردستانێ ب تایبەتی بت، وەک نموونە بۆ رۆژهەلاتا مەزن، ب رێژەیی كو تنێ حزبا خودان دەستهەلات دئاخڤت، واتە ژێبوونا تەکەکەسی چەند بۆ سازییا حزبێ هەیە ئەو دئاخڤت و نەتەوە و پیرۆزیێن دی ب تنێ پێخوارنن و د کەڤنە د خانێن دوماهیێ دا ژ خانێن بەرژەوەندییێن تاکی و کۆمی و حزب بڕیارا دوماهییێ ددت، وەک دی زانین و باوەڕنامە و تشتێن دی نەگەلەک د گرنگن و دبت گەلەک جاران د کیستێ خودانی دمینن و هەتا دمرت ژی مفای ژێ نەبینت.
ئەڤ واقعێ تەحل، د سازییێن ئیراقێ و هەرێما کوردستانێ دا باش یێ زەلالە کو گەلەک یا ب زەحمەتە مرۆڤ کەسەکێ تەکنۆکرات و خودان شیان ببینت سازییەکا میری ب رێڤە دبت، هەکە بەری هەر ساخلەتەکێ مریدییا حزبێ و مەزهەبی ل دەف نەبت. پترییا ئەو کەسێن ئەم د پۆستێن بلندێن وەزارەت و دەستە و رێڤەبەریێن ئیراقێ و هەرێمێ دا دبینین، ب کێر بێن یان ب کێر نەئێن، هەر ئەو کەسانێن حزبینە هەتا سەرهەستی کورسی وەرگرتین و خالا بالکێش ئەوە کو خودانێ کورسییێ پارێزبەندییا حزبی هەیە و هەر جۆرەکێ دزی و گەندەلییێ بکت، گەلەک یا ب زەحمەت ئەو کەس وەسا ب ساناهی بەرانبەر دادوەری رابوەستت، گرانترین سزا هەکە هەبت، دێ ژ پۆستێ وی ئێتە لادانێ، هەکە چو کارێن باشتر بۆ نەبینن دێ بۆ دەمەکی ل مال بێنا خوە ڤەدت، هەتا کارەکێ دی بۆ دبینن یان ژی وەک خانەنشین بمینت.
ئەڤە نێزیکی بیست سالانە ئیراقا ب ناڤ فیدرال و پتر ژ 30 سالانە هەرێمێ ب ناڤ هەڤگرتی یا د ڤی سیستەمی دا دنالت و رۆژ بۆ رۆژێ کەمباخترە. ئها ئەڤە برینە لێ دەرمان نینە.
ئانکو کێ ب هێزترە، حزبیترە و واستەکێ باشتر هەیە، هەر ئەوە کورسیێ وەردگرت و دگەهتە ئارمانجێن خوە، ئەڤێن دی هندی زانا و تێگەهشتی بن، بەرانبەر ژێبوون بۆ حزبێ نەبت، ئەو ژ مووچێ خوە زێدە دینارەکێ نابن، هەر ئەڤەیە نها هەرێم د بت پتر ژی ژ ئیراقێ باجا ڤی سیستەمی کلاسیکی ددەن و رۆژ بۆ رۆژێ پاش دکەڤن، ژ بەر کو بەرپرسێ حزبی بەریا هەمیان بۆ خوە دکت، پاشی بۆ حزبا خوە، و چو بۆ وەلاتیبوونا وان نامینت… ئها ئەڤە برینە، لێ دەرمان نینە.
