هندی رەخنا تاکە کەسی، سەخمەراتی بەرژەوەندیێن وی یێن کەسۆکی تنێ بت کو ببینت غەدر ل وی هاتیە کرن و نەیا گشتی بت د خزمەتا مرۆڤایەتیێ دابت، هەر دەستهەلاتەکا گەندەل دێ هەر درێژە پێدانێ ب حوکمێ خوە دەت. دیرۆکێ ئەڤە سەلماندیە کو هەر جڤاکەک شیای لسەر دەستهەلاتا خوە گەندەل زالببت، هنگی رزگار بوویە دەمێ سۆمبۆلێن وێ بەرخودانەک دژوار دگەل رێکێن حەز وترساندنا( ترهیب و ترغیبا) دەستهەلاتێ کری و رادەست نەبووین. ب مخابنیڤە دبێژن ئەڤ جۆرە رەخنەیا ئەقلی هەکە ل کوردستانێ هەبت ژی نە دئاستێ پێدڤیدانە و د کەڤیتە د خانا دەستێ تنێ دەنگ ژێ ناهێت دا.
ئها ژڤێ خالێ دێ پێڤە چم و بێژم هندی هەر دەستهەلاتەک نەکەڤیتە ژێر گڤاشتنا چینێن جڤاکی گەلەک ب زەحمەت بشێت خوە بگوهۆڕت. واتە هندەک جاران مرۆڤ دگەهت وێ باوەریێ هەکە حوکم بکەڤت دەستێ وان رەخنەگران ژی یێ کو دبینن غەدر تنێ ل وان هاتیە کرن، رەنگە دەمێ ئەو دەستهەلاتێ وەردگرن، ژ وان گەندەلچیێن دەستهەلاتێ کامباختر بکن و وەکی نها ئەم دبینین پشتی پتر ژ بیست و حەفت سالێن ئازادیێ، حزبێن مە بێی جوداهی ب رێژە ژ سەدام حسێنێ خرابتر رەفتارێ دکن، ژ بەر کو خەلکەک نها ب دەنگەک بلند دبێژن: رەحمە ل گۆڕا کفندزی!
