زاراڤێ پشتبەستن ب یێ دی (الاتکالیە) د دەروونناسیێ دا دهێتە بکارهینان بۆ وان کەسێن باوەری ب خوەنەیی و خوە دهێلنە ب هیڤیا خەلکەکێ دیڤە کو وان راگرن و بگەهینن ئارمانجێن ژ دەستداین و دەستپێشخەریا بزاڤا گەهشتنێ ل دەڤ وان یا لاواز بت. وەسا دیارە تاک و جڤاکێن پاشکەڤتی هەردو تووشی ڤێ نەخوەشیا جڤاکی دبن و گەلەک ڤەکۆلین سالانە ژ لایێ جڤاکناس و دەروونناسان ڤە دهێنە ئەنجامدان، سەخمەرات گەهشتنا باشترین رێکێن دەستنیشان کرین بوو چارەکرنێ. لێ مخابن ئەڤ ئەزموونە هێشتا د وەلاتێ مە دا گەلەکا ساڤایە و وەختەک درێژ پێدڤێت هەتا وەک پێدڤی گەشە بکەت و دەستی داننە سەر برینێ.
ئها ژ ڤێ خالێ دێ دەستنیشان کەین، نها ژی پشتی نیزیکی 30 سالێن ئازادیێ و هاتنا نفشەکێ نوو یێ گەنجان، دێ بینین پڕانیا وان گەنجان ژ نفشێ بەری خوە پتر پشتبەستنێ ب هیمایێن پیرێن دەستهەلاتێ دکەن کو ئەو سەرکێشیا جڤاکی بکەن و ژ زنجیرا قەیرانێن بەردەوام رزگار بکەن. خالا بالکێش ئەوە دێ بینین دێ هندەک هەڤالێن تووڕێن جڤاکی مژارێ پۆستەکی ژ پۆستێن پێدڤی گوهۆڕینێ دئازرینن، دێ ناڤێن هەمان کەسێن ب دەهان سالن د پۆستێن حزبێ و ئیدارێ و عەسکەری دا و تنێ ب مرنێ دهێلن بۆ خەلکی رێز کەن کەنە پرسیار: کیژ ڤان بەرێزان ب کێر فلان پۆستی دهێت؟
دبت هەر کەسێ دیتنەک ئەقلانە و رەخنەیی هەبت، دەمێ ڤان؟جۆرە هزرێن کلاسیکی دبینت کو سەرێن پتریا تاک و جڤاکێن مە گرتیە بێ هیڤی بوونەک بۆ دیار دبت کو هێشتا ئەڤ خەلکە گەلەک پاشڤەمایە هەتا کو ئەو هیشیاری و ئیرادە بۆ وان چێ بت کو پشتبەستنێ ب خوە بکەن و نەمیننە ب هیڤیا خەلکەک دیڤە داکو بگهینن ئارمانجێن ژ دەستداین. ژ بەر کو ئەو کەسێن هندەک هەڤال پێشنیاز دکەن جارەکا دی پۆستەکی وەرگرن، هەمان بەرپرسێن د پۆستێن خوە دا ب درێژاهیا 28 سالێن رەبەق رزین و تنێ خزمەتا خوە و مالباتا خوە ل سەر حسێبا سامانێ گشتی کرین، بلا پشتراستبن ئەڤ جۆرە بەرپرسێن پارێزمەندیا (حصانا)حزبێ هەی کو هەکە دهۆکێ هەمیێ بفرۆشن و گەندەلیێ بگەهینە سەر هەستی، نەدچنە بەرانبەر دادوەری و نە کەس دبێژتێ پێلاڤا پێ هەوە ژی یا خواهرە. لێ دەمێ نفشێ نوو یێ گەنجان ئەڤ دیتنە هەبت، دیارە پشتبەستن ب یێدی و هەلوەشیانا کەسۆکیا تاک و جڤاکێ کوردی رۆژ بۆ رژێ بەرەف کەمباخترە و گوهۆڕین و پێشڤەبرن هێشتا د گەوریا بتلەی خەتمی ماینە.
زاراڤێ پشتبەستن ب یێ دی (الاتکالیە)
