کوردان چیرۆکەکا فولکلۆری هەیە ب ناڤێ ((عەبدولڕەحمان ئاغایێ زۆرباشی))، هونەرمەندێ مللی ((حەسەن عەلی خەنجەر)) ب دەنگێ خوە یێ زەلال کریە سترانەک ناڤدار.. کورتیا ئالیەکێ چیرۆکێ، وەک نموونە بۆ رەوشا ئەڤرۆ یا ئیراقێ، هەر ل چاپتەرێ ئێکێ ژ چیرۆکێ، گوهدار هەست پێ دکەت کو پشتی قارەمانێ چیرۆکێ عەبدولڕەحمان ئاغایێ زۆرباشی ژ بابێ خوە تووڕە دبت، وەک گەنجەک خوینگەرم و ژ وارێ خوە دووردکەڤت و دچت دبتە خولامێ خولامێ بابێ خوە یێ بەرێ ئۆسمان ئاغایێ دەقوری. لێ وەک خولامەک عادی ب ناڤێ عەبدۆ خوە ددەتە نیاسین و ئۆسمان ئاغا نزانت کوڕێ ئاغایێ وی یێ بەرێیە.
پشتی مێرخاسیا خولامێ نوو، ب وەختەک کێم دیار بووی ب رێکا بەرگیرکرنێ ژ عەشیرا دەقۆڕیان، دەمێ عەشیرێن دی ئێریش دکرێ یان وان ئێریش دکرێ، هەر وەسا ب رێکا راڤونێچرێ کو عەبدۆ زەلامەکێ ب شەرتێن خوەیە و چو زەلام د عەشیرێ دا نە بوون، نە بۆ مێرانی و شوور و مەتالێن خوە، نە بوو راڤونێچیران دەستێ وی بگرن. ژ بەر هندێ دەمێ ژ نێچیرێ دزڤڕی خولام و خدام پێشڤە دچوون و ئەو نێچیرا کری ژێ دوەرگرت و هەسپێ وی ئێموالیک دکر، دەمێ دچوو دژوورڤە ئۆسمان ئاغا پێشڤە رادبوو و ب رەخ ویڤە دروونشت. هوسا سەر ژ هەموو خولامان ستاند، تایبەت عەبدیکێ سەرۆکێ هەموو خزمەتکاران.
دەمێ عەبدیکێ سەرۆکێ خولام و خدامان دیتی کو قەدرێ عەبدۆیێ خولامێ نوو هاتی چو ژ یێ ئاغای کێمتر نینە و ناڤ ناڤێ ویە دناڤ عەشیرێ دا، ئێدی وان بهایێ خوە د کۆچکێ دا وەکی جاران نەما. وی هزرا خوە د پلانەکا خەتەر دا کر و هەمی خولام و خزمەتکار کۆمکرن و بۆ وان دیار کر کو عەبدۆیێ خولامێ نوو هاتی نانێ وان بڕی، هەکە ئەو تکبیرەکێ نەکەن ئێدی ئەو نەشێن نانی ل کۆچکێ بخۆن و جهێ وان د عەشیرێ دا نەما و دڤێت بار بکەن.
پیلانا عەبدیکێ خولام دانای، گۆتە وان، ئەم هەموو دێ خوە خزمەت نەخوەش کەین دگەل ئاغای، هەکە پرسیار ژ مە کر ئەز دێ بێژم ئەزبەنی ئەم عەشیرین و بێ نامووسیێ قەبوول ناکەین. دەمێ ئاغای پرسیار کر، ئەز دێ بێژمێ من دیت عەبدۆکێ خولام سپێدێ زوو ژ ئالیێ حەریما ئاغای دەردکەت، ڤێجا من نەزانی ژ جەم ژنا تە یا بچووک دهات یان ژنا تە یا مەزن، پاشی هوون هەموو دێ سووند خۆن. ئانکۆ گۆتن ژ من سووند ژ هەوە.
پشتی دەست ب پلانا خوە کری و ئاغای گازیکریێ و عەبدۆکی خولام ب کێشا نامووسێ ل دەف ئاغای تاوانبار کری، ئێدی ئاقل د سەر ئاغای دا نەما و مانە ل هیڤیا وی هەتا ئێڤاری ژ راڤونێچیران دزڤڕت.
دەمێ زڤڕی خولام و خدامان وەکی جاران پێشوازی لێنەکر و وی ب خو نێچیرا خوە دەینا و هەسپێ خوە ئێموئالیک کر.
دەمێ چوویە دکۆچکێڤە و سلاڤ کری و ناڤچاڤێن گرێ یێن ئاغای دیتین و کەسێ سلاڤا وی ژێ وەرنەگرت و جهێ خوە نەدایێ و ل بنێ کۆچکێ جهێ خوە کری و کەسێ ب خێرهاتنا وی نەکری، هەچیێ وی پرس ژێ دکر، کانێ بۆچی ئەو دعاجزن؟! بەرسڤا وی ب ئاخڤتنێن کرێت دهاتە دانێ! ئێدێ وی هزرا خوە کر و د دلێ خوە دا گۆت: ((هەبت نەبت ئەڤ سوحبەتە هەمی دژی منە، دەم هات ئەز ناسنامەیا خوە یا دروست دیار بکەم، هەکە ئەڤە دێ ئاڕیشەکا مەزن بۆ من چێ کەن!))
سۆرپرایزا عەبدۆیێ خولام بۆ ئۆسمان ئاغای چێ کری، رابوو سەر چۆکێ خوە و ب تبلێ دگەل ئۆسمان ئاغای ئاخڤت و گۆت:
ـ ئوو ئۆسمانۆ، ئوو ئووسمانۆ…
دەمێ ناڤێ ئاغای ب ناڤێ ویڤە نەکری و وەسا ب بێمەنتی دگەل ئاخڤتی، ئۆسمان ئاغا بزدیا و زانی مەسەلە ژ دەست دەرکەت. تایبەت دەمێ عەبدۆی ب قەبەی دیار کری کو ئەو عەبدولڕەحمان ئاغایێ زۆرباشیە، کۆرێ زۆرتەمەر پاشایێ ئەیبێ ملیە، ئەو شێرێ ملانە! ئێدی دەمارێن ئۆسمان ئاغای راوەستان و ژ نوو زانی هێشتا ئەو خولامە و هەر ملینە ئاغایێن وی یێن راستەقینە. ڤێجا هندی هیڤی ژێکرن کو ل وی ببۆرت لێ بێ مفا بوو. کوڕێ ئاغایێ ملان سۆز دا کو هەر مەرجەکێ ئەو ددەتێ بجهبینت، لێ بەرامبەر ئەوژی وان کەسان دیار بکەت ئەوێن بێ بەختیا نامووسێ لێکری، هەکە ئەو دێ وێ کەت یا کەسێ نەکری! د وێ گاڤێ دا عەبدیکێ بەرپرسێ خولامان ب خولامڤە بەعەجین و کونێن مشکان لێ بوونە قەیسەری، لێ یا ژ قەستا بوو.
ژ ڤەگێڕانا روودانێن نها ل ئیراقێ دیار دبن کو ئەڤ خوە پێشاندانێن ل دهێنە کرن ئارمانج ژێ پتر نەمانا عادل عەبدولمەهدیە، مینا ئارمانجا ئۆسمان ئاغای و عەشیرا وی نەمانا عەبدۆکێ خولام، ژ بەر کو ب کریار عادل عەبدولمەهدی د ڤی ماوەیێ کورتێ دەستهەلاتا خوە دا دیار کر کو ئەو ژ گەلەک ئالیانڤە باشێ هەموو سەرۆکوەزیرێن بەریا خوەیە و پەیوەندیێن وی دگەل هەموو ئالیان دباشن، تایبەت کوردان، ئەڤە ژی د بەرژەوەندیا گەلەک ئالیێن دەرڤە و ناڤخوەیی دا نینە، ژ بەر هندێ خوەپێشاندانێن برسیێن ئیراقێ بۆ خوە ئیستیغلال دکەن و تەسەییس بکەن داکو حوکمەتا عەبدولمەهدی بێخن و بگەهنە ئارمانجێن خوە یێن گەنی و ئیراقێ ب گشتی بەرەف ئاقارەکی تاری ببن و گەلەکا ب زەحمەتە بشێن کەسەک مینا عەبدولمەهدی ببینن. ڤێجا بابەتێ خەتەر ل ڤێرە دمینتە ل سەر شیان و زیرەکیا عەبدولمەهدی و ئەوێن پشتەڤانیا وی دکەن، هەکە ئالیێ وانێ هەڤکێشێ ب هێزتر بت ئەڤە مان و ئیراق بەرەف ئاراستەیا گونجای چوو، هەکە دروست نەبت، ئەڤە بەرەڤ وێران بوونێ چوو، رەنگە تنێ دکتاتۆرەک بشێت ئێدی رەوشێ کۆنترۆل بکەت.
