من فلمێ هندستانی، ژ فلمێن دیستۆتۆبیایی و هەڤڕکی ژ بوو مانێ، ب ناڤێ (ژیانا بزنێ) دیت و ڕۆمانا ب ناڤێ (رۆژانێن بزن)ێ ژی خواند کو سیناریۆیا فلمی ژ چیرۆکا وێ هاتیە وەرگرتن.
هەژی گۆتنێ یە، ڕۆمانا (ڕۆژانێن بزنێ)، ژ نڤیسینا بنیامینێ هندستانی یە و ل سالا 2008 پترترین کتێب بوویە ل ویلایەتا کیرلی یا هندستانێ هاتیە فرۆشتن و ب دەهان جاران هاتیە چاپ کرن.
ل سالا 2024 سینارست و هونەرمەندێ هونەرێ حەفتێ (بلیسی) ب پشکدارییا کۆمەکا کۆمپانییێن هندی – ئەمریکی ب دەرهینانا فلمی ڕابووینە. واتە فلم بەرهەمەکێ جیهانی یە و ژ بووشایێ نەهاتیە چێ کرن.
بۆ من وەسا دیار بوو کو سینارست و دەرهینەر ب رێژەیەکا باش ل دووڤ تێکستێ ڕۆمانێ چۆینە و هەر تشتکێ گەوهەری د ڕۆمانێ دا هەیی ژ پەیڤان کریە دیمەنێن لڤۆکێن سینەمایی و من خوەشی ژ هەردو داهێنان دیت.
کورتییا چیرۆکێ ئەوە کەسەک ژ هندستانێ مینا هزاران کەسێن دی ل گەل هەڤالەکی ب ناڤێ حەکیم، وەلاتێ خوە و خێزانێ خوە دهێلن و ل دووڤ خەونێن خوە یێن پیڤازی بەرەف عەرەبستانا سعوودی دچن دا کو کەبابا بخون ب سەر داخکرنا سمێن دەواران هەل دبن.. پشتی گەشتەکا تژی ئاستەنگ، پێک ڤە ژ هندستانێ دەردکەڤن، هەر ئێک ژ وان دکەڤتە دەستێن شێخەکێ خودان ئاژەل ل چاندنگەهەکا بیابانێ و پاسپۆرتێن وان ژێ دستینن و د دڕینن و نێزیکی سێ سالان وەک کۆیلە د کووراتییا جەهنەما بیابانێ دا ل بن زولما وان شێخان ل گەل تەرشوتەوالی و حێشتران دمینن، هەتا کەسەکێ ئەفریقی ب ناڤێ براهیمێ قادری دهێت و بزاڤێ دکت هەر ئیکی ژ وان جوداجودا، ژ بن ستەما شێخێن وان ب ناڤێ (ئەرباب)، وەکی د ڕۆمانێ دا بەحس کری، یان (کەفیل) وەکی د فلمی دا ناڤلێنایی ڕزگار دکت.
بەری هەرسێ بگەهنە سەر مێرگا ئاڤێ د بیبانێ دا، هەڤالێ نەجیبی ب ناڤێ حەکیم دمینتە دبن پێلێن خیزێ باهۆزێ بیابانێ ڤە و دمرت. پشتی براهیم قادری نەجیب محەمەدی دگەهنتە سەر ئاڤێ و جادەیێ نیشاددت، ژ نشکەکێ ڤە لێ بەرزە دبت. نەجیب پتر خەمگین دبت و ب تنێ دمینت. لێ هەر شەڕێ مرنێ دکت و ڕادەست نابت.
دووماهییێ دگەهتە جادەکا سەرەکی و زەنگینەکێ سعۆدی ب ترومبێلا خوە وی ڕزگار دکت و بەرەف باژێڕی دبت. ئەو وەک هۆڤ و دینان ب ناڤ باژێڕی ڤە دچت و قەستا خوارنەگەهەکا ب زمانێ مالیالامی ل سەر نڤیسی دچت و نەهش دبت و دکەڤتە بەر دەرگەهێ خوارنگەهێ و خودانێ وێ وی ژ مرنەکا مسۆگەر ڕزگار دکت.. پاشی حوکمەتا سعۆدیێ ل گەل سەدان پەنابەرێن نەقانوونی یێن وەک وی، دیپۆرتی هندستانێ دکن و چیرۆکا وان یا تراژۆدی ب دووماهی دهێت و دەست ژ پیا درێژتر دزڤڕت.
خالا بالا من کێشایی، ڕۆمان وەک ژیاننامەیا کەسۆکی یا راستەقینە، ژ مێرنشینا کیرلی یا باشووری هندستانێ یە، ب ناڤێ کارەکتەرێ سەرەکی یێ ڕۆمانێ نەجیب محەمەد هاتییە ڤەگێڕان و شێوازێ دیالۆگێ گەلەک یێ لاوازە تێ دا. سینارێستی دیالۆگ ب شێوەیک گونجایی نڤیسیە کو بینەر بشێت د دو دەڤۆکێن زمانێن د ئێکودو نەگەهن ل باشورێ هندستانێ ب ناڤێ دەڤۆکا (مالیالامی) یە و عەرەبستانا سعۆدی یە ب دەڤۆکەکا بەدویێن بیابانێ بگەهت.
خالا بالکێش د ڤی کارێ ئەدەبی ـ هونەری دا، من وەرگرتی، ئەو جوانکارییا هندە سالن، شاهزادەیی عەرەبستانا سعوودی یە محەمەدێ کوڕێ شاهـ سەلمانی پێڤە کو ڕوویێ وەلاتێ خوە یی خودان عەقلییا قەبیلێ جوان کت و شارستانی نیشا خەلکی بدت، هەمی د بەر ئاڤادا چۆ و ڕۆماننڤیسەکێ ڕۆمانەک ب دەڤۆکەکا لۆکالی نڤیسی و دەرهینەرەکێ چالاک کریە فلمەکێ دیستاتۆبیایی هەمی د بەر ئاڤێ دا بر و حەیقەتا جڤاکێن ڕۆژهەلاتا ناڤین تایبەت وەلاتێن کەنداڤی بۆ سەرانسەری دونیایێ ئاشکرا کر کو هێشتا گەلەک مایە ببن وەلاتێن دەمۆکراسی و مل ب ملی وەلاتێن پێشکەڤتی پێشڤە بچن. ئها هۆسا ئەدەب و هونەر دشێن ڕەش و سپی ژێک جودا کن و پەیاما خوە د خزمەتا مرۆڤایەتییێ دا بگەهینن و ڕژێمێن دکتاتۆر، دز و گەندەل و شەرمزار بکن.
