پشتی ئەز دگەل نڤیسەرێ پرتووکا (جینۆم) (مارت ریدلی) چوویمە د جیهانا ناڤەڕۆکا پرتووکێ دا و جیهانا سەیرو سەمەرا جیناتێن 23 جووتێن کرۆمۆسۆمێن شانێن لاشێ مرۆڤێ و هندەک گیانەوەرێن دی بۆ من بەرچاڤ کرین، وەرچەرخانەک نوو کەتە د هزرا من دا و ژ نوو من زانی هەر جۆرەکێ جیناتێن شانێن لاشێ مرۆڤی بەرپرسە ژ لەشێ مرۆڤی کو بەردەوامیێ ب ژیانێ بدت بێی کو ئەم تشتەکی بەرچاڤ ژێ بزانین.
بۆ من ب رۆهنی خویابوو کو جیناتێن مرۆڤی 23 کرۆمۆسۆمێن ژ هەڤ جودا د شانێن لەشێ مرۆڤی دا پێک دهینن. ئەڤ کرۆمۆسۆمە 22 کرۆمۆسۆم ژ وان دهێنە نومرە کرن، گۆرەی رێزبەندا تەخمینی یا قەبارێ وێ، مەزنا وان ژ هژمار (1) دەستپیدکەت، هەتا بچووکا وان کو جووتێ (22) یە. جووتێ دمینت، دو کرۆمۆسۆمێن مەزنن کو ژ (x) د لەشێ رەگەزێ مێ دا و کرومۆسۆم (x ) دگەل کرۆمۆسۆم (y ) یا بچووک د لاشێ زەلامی دا. رێزبەندیا کرۆمۆسۆم (x) دەربارەی قەبارەی، ل ناڤبەرا کرۆمۆسۆمێن 7ـ 8 دهێت، بەرامبەر کرۆمۆسۆم بچووکترین قەبارە هەیە.
نڤیسەری ب شێوەیەک زنستی بۆ مە دیار کریە کو هەر جووتەکی کرۆمۆسۆمان ل دەڤ مرۆڤی بەر پرسە ژ تشتەکی دا کو مرۆڤ بەردەوام وەرارێ بکەت و د گەشەسەندنێ دا بت. جووتێ کرۆمۆسۆمێن ئێک، بەرپرسە ب ژیانێ. یا دوو بەرپرسە ب جۆرێ بوونەوەری. یا سێیێ بەرپرسە ژ دیرۆکێ، چارێ بەرپرسە ژچارەنڤیسی، یا پێنجێ بەرپرسە ژ ژینگەهێ، یا شەشێ بەرپرسە ژ ژیریێ (ذكاء)، یا حەفتێ بەرپرسە ژ خۆرسکێ، (غریز)ێ یا هەشتێ بەرپرسە ژ هەڤڕکیێ، یا نەهێ بەرپرسە ژ گرنگیدانێ خوەدی، یا دەهێ بەرپرسە ب نەخوەشیێ، یا یازدێ بەرپرسە ژ نەئارامیێ، یادووازدێ بەرپرسە ژ کەسۆکیێ، یا سێزدێ، بەرپرسە د خرڤەکرنا خوەدی دا، یا چاردێ بەرپرسە ژ بەری دیرۆکێ، یا پازدێ بەرپرسە ژ نەمریێ، یا شازدێ بەرپرسە ژ سێکسی، یا هەڤدێ بەرپرسە ژ بیردانکێ، یا هەژدێ بەرپرسە ژ مرنێ، یا نوزدێ بەرپرسە ژ چارەکرنێ ، یا بیستێ بەرپرسە ژ خوەپاراستنێ، یا بیست و ئێکێ بەرپرسە ژ سیاسەتێ، یا بیست و دووێ بەر پرسە ژ باشیا دووندەهێ، یا دوماهیێ بەرپرسە ژ ئیرادەیا ئازاد وەک تێگەهەک فەلسەفی.
هەژی گۆتنێیە، ئەڤ پرتووکە ژ 404 رووپەلێن قەبارێ مەزن پێک دهێت و ژ وەرگێرانا د. مستەفا ئیبراهیم فەهمیە و ل ڤێ دوماهیێ من جارا ئێکێ خواند و پێدڤیە مرۆڤ پتر ژ جارەکێ ب تەرکیز بخوینت، هەتا کو هزرا مرۆڤی بشێت زانستێ وێ یێ بایۆلۆجی هەرەس کەت و پتر مفای ژێ وەربگرت.
