شانۆنامە
بابەت ب هندەک پرسیاران دهێتە ڤەکرن، ب سحبەت و ترانا دهێتە درێژکرن، پاشان ب کورتی و بەرسڤێن ئێک لایەن ب داوی دهێت.
ئازاراندنا هندەک بابەتان کو دبیت هێلا سۆر بن بو گەلەک کەسان، بەلێ کارێکتەر دبێژیت مانە (ئازادییە)، ڕامان ژ ڤان جورە مرۆڤان ئەڤەیە، کو مایێ خو د هەمی بابەتاندا دکەن و یێ بەرامبەر نەشێت ڕازی بکەت، کەسێن سادە ژی دکەڤنە ڤان خەفکان و دهێنە لاواز کرن ب زانینا یێ بەرامبەری خو. بەلێ ژ بەر کو یێ دی دروست د ڕامانا (ئازادییێ) نەگەهشتییە ئێکسەر بێدەنگ دبیت و چو بەرسڤ نابن. ژ بەر کو ئەڤ کەسێن هە، د چایخاناڤە نە، ڤێجا ئاخفتنا کولانێ لسەر زمانێ وان یا زالە.
هەر تشتەک کرییە د قالبێ ئازادیێ دا، لێ وی مافی نادەتە هەڤالێن خو، بەلکو ڕێکێن تاری ل بەر چاڤان ڕۆهن دکەت و د بنیاتدا قەد ڕۆهن نابن. ئەڤ کەسە، گومانێ لسەر هەڤالێن خو دروست دکەت و قەناعەتێ ب ڕێکێن نەراستەوخو بو دروست دکەت. کارتێکرنەکا ئێکجار نەخوش ژ لایێ دەروونی ڤە لسەر هەڤالێن خو دروست دکەت، هەمی پێکولا دکەت وان ڕەش بکەت و خو سپی بکەت.
د ڤێ پەرتوکێ دا، بەحس ل نەدادپەروەریێ هاتییە کرن و مافێ کەسێن بکێرهاتی هاتییە خوارن، کەسێن نیاسێ وێ هە و یێ بێ باوەرنامە نهادا هەمی تشتە، یان باوەرنامێن ب فێل و خشە. ل ڤێرێ پالڤەدان ژ کێ دەستپێدکەت و کا کییە دبیتە ئەگەرێ سەرەکی یێ ڤان جورە گەندەلیان، ئەرێ ما مافێ ژنێ ژی نینە ب خوشی بژیت؟ هندەک جارا ژن دبیتە کلیلا سەرکەفتنێ بو زەلامی، بەلێ کیژان سەرکەفتن و لسەر کیستێ کیژان خولیسەران. پالڤەدانەکا دن یا هەی، ئەو ژی دەروونە و خو ڕازیکرنە، هێجەت گرتنە بو هندەک کێماسیا و مەزن بەرفرەهکرنە ژ هندەک کارێن کێم. تنێ دا خو ڕازی بکەت و بارێ دەروونێ خو سفک بکەت.
هندەک کەسان د بیروباوەرێن واندا کو دشێن د یاخی بن، دێ هێن و بێژنە خەلکی کو ئەڤ تشتە چ نینە یان (سفرە)، ئانکو چنە ب چنەهیێ بچووک نابیت.چنکو ئەڤ چنەهییە ب هزرکرنێ بو پەیدا نەبوویە، بەلکو ب دیتنەکا ژ دیرڤە یان گوهدانەکا کو بێهنا دەروونێن ڕەشبین ژێ دهێت.
مرۆڤ دەمێ چنە بیت، نەشێت کەسێن بکێرهاتی بینیتە د هەبوونێدا. ژ بەر کو یێ چوویە ژ دەرڤەی وێ بازنێ، ڤێجا وێ چەندێ ب سەختە دبینیت. ئەڤ جورێ کەسان شەرێ هەبوونا خو دکەن نەک بوونا خو. ڤێجا یاخی بوون ئەو نینە تو بێژی نەخێر.
ئەز دشێم بێژم: تەکتیک یان شێوازێ نڤیسینێ گەلەکا نورمالە، ئەز وەسا هزر دکەم کو نڤیسەری حەز کریە ب وی ڕەنگی بیت، ژبەر کو شانونامەیە و دا هەمی بکارن بخوینن، نڤیسەری سەرۆچاڤ ب دروستی دیارنەکرینە، ئەڤ چەندە ژی هێلایە خەما دەرهێنەری، کویراتی تا ڕادەیەکێ دناڤدا هەیە، بەلێ هەتا سەر هەستی نەچوویە، ئەڤێ چەندێ ژی ئەگەرێن خو هەنە، بو هندێ یە بینەر گەلەک دناڤ هزراندا نەچیت و هەر دناڤ کەشێ شانویێ دا بیت.
