پشتی من ل ڤێ دووماهییێ ڕۆمانا نڤیسەرێ جیهانی هارۆکی مۆراکامی، ب ناڤێ ((کافکا ل سەر لێڤا دەریایێ)) خواندی، ژ بلی ئەو داهێنانا ڕۆماننڤیسی د نڤیسینا رۆمانا خوە دا کری کو ب شێوەیێ فیلۆسۆفی و (واقعیا سحری) نڤیسیە، ڕۆماننڤیسی بەحسێ پرانییا بیاڤێن واقعێ جڤاکی، ئابۆری و لەشکەری یێ وەلاتێ خوە ژابۆنێ و هندەک وەلاتێن دی کریە، ب تنێ دزی و گەندەلی، دکتاتۆرییا و ئەنارکییا سیاسی تێ نەبن، هەکە کربت ژی هند ب کێمی کریە کو خوینەر تێ نائینتە دەرێ رەخنەیە. ئەڤە ژی وێ چەندێ دگەهینت کو ڕۆمان خۆدیکا جڤاکی یە و ڕۆماننڤیس سەر و چاڤێن خوە و جڤاکی یێن هۆشی و نەهۆشی ب گەلەک رەنگان تێ دا دبینت و ب شێوەیەکێ داهێنانی دادڕێژت. هەلبەت هەکە دزی و گەندەلی د جڤاکێ وی دا هەبن ژی، وەک دەولەتەکا دەمۆکراسی، لیبرالی دستووری حالەتن، وەکی جڤاکێ مە نەبووینە دیاردەیێن نەهێنە چارە کرن.
دەمێ خوینەرێ خودان گەنجینەکا مەعریفی ب تەرکیز ڤێ ڕۆمانێ دخوینت، دێ بۆ دیار بت کانێ هارۆکی مۆراکامی یێ ژاپۆنی چەند ب ئازادی و بێسانسۆر و بێلایەنی ئاڤاهییێ ڕۆمانا خوە نژنیە. ئەو ب خەیالا خوە یا کوور دیار دکت کو ئەو یێ شەهرەزا و زانایە د پرانییا بیاڤێن مەعریفی دا. خوینەر دێ خوینت، دەمێ بەحسێ دیرۆکا وەلاتێ خوە و وەلاتێن دی دکت دێ هزرکت، ئەو تایبەتمەندەکێ دیرۆکی و جۆگرافی یە. دەمێ بەحسێ دەریایێ و دارستانێ و سەقای و جۆرێن خوارنێ و زمانێ گیانەوەران تایبەت پشیکان، ئەندازەیا ئاڤاهییان، جادە، میترۆ، پر، پەرستگەهـ و خوارنین وەلاتێ خوە دکت، دێ هزر کی نڤیسەری بلیمەتیەکا تایبەت هەیە د وان بیاڤان دا. ئەز بەحسێ بابەت، روودان، ڤەگێڕان، ئافراندن و کارەکتەر و تەکنیکێن ڕۆمانێ ناکم، بلا بۆ خوینەری بمینن.
دووماهییێ ب تنێ دێ بێژم، گۆتنا فیلۆسۆفێ جیهانی هیگلی ڕاستە، دەمێ گۆتی: ((ڕۆمان بۆ جڤاکێن هشیار و هشیارتر دهێتە نڤیسین و شعر بۆ جڤاکێن کلاسیک دهێتە نڤیسین)). ژ بەر کو ئەو ناڤ و سیمبۆلێن رەوشەنبیری و فیلۆسۆفی هارۆکی مۆراکامی د ڕۆمانا خوە دا تەوزیف کرین، بۆ جڤاکێن هێشتا د ناڤبەرا قۆناغێن دینی و سحرێ دا بەرزە بووین نەنڤیسییە دبت بۆ جڤاکەکێ هشیار و هشیارتر و رێکخستی و خودان سازییێن فیلۆسۆفی وزانستی و دبەردەوامییا پێشکەڤتنێ دا نڤیسیە.
