گۆرەی دیتنا من بۆ روودانێن نەتەوەی، دەمێ ل هەر پارچەیەک کوردستانێ رووددەن، ژ رفتارێن پڕانیا کوردستانیان دیارە کو خەلکێ مە ب نەفسەک لاواز و زارۆکێ نازدارکری، دەرڤەی مەنتقێ عەقلی سەرەدەریێ دگەل کێشەیێ دکەت و ژ گۆتارا وان یا لاڤەلاڤ و خەبەرگۆتنێ خویا دبت کو هەر وەک کوردان گرێبەستەک جڤاکی دگەل وەلاتێن نەیار وزلهێز هەی کو وان هەردەم بپارێزن و بکەن کیانەک خۆسەر، لێ ئەو جوانیێ کرێت دکەن و ب بێ ئەخلاقیا خوە یا نەمرۆڤدۆستانە وان ناپارێزن و هەر دەم دهێلنە ب هیڤیا خودایڤە د دەستێن داگیرکەر و نەیاران دا.
رەنگە ئەڤ دیتنا عاتفی، هەلچۆنی (انفعالی) پتر بۆ نەهۆشیا کۆمی ل دەف جڤاکێ کوردی هەی دزڤرت، ئەڤە د دەرووننسیا جڤاکی دا دهێتە نیاسین کو هەر دەم جڤاکێ کوردی خوە هێلایە ب هیڤیا خەلکەکێ بیانیڤە کو ببت قارەمانێ ئەفسانەیی یێ قورتال کەر، مینا یەسۆعی ل جەم فەللەیان، محەمەد مەهدیێ چاڤەرێکری ل دەف بسورمانان و شەرفەددینی ل جەم ئێزدیان کو بهێت وان رزگار بکەت.
واتە پڕانیا کوردستانیان وێ نزانن کو وەلاتێن زلهێز مینا ئەمریکا و رۆسیا و وەلاتێن دی هند هەڤالێن کوردانن هندی بەرژەوەندیێن وان پێ هەین، مینا تەپا د ناڤبەرا دو تیمێن تەپا پێی دا، هەر دەمێ تەپە چو ژ دەرڤەی مەیدانا یاریا بەرژەوەندیێن وان، هینگێ یاریێ گیرۆ ناکەن و دێ بۆ خوە تەپەکا دی ئینن.
روودانێن پێرار دەمێ ریفراندۆم ل هەرێما کوردستانێ هاتیە ئەنجامدان و جڤاکێ نێڤدەولەتی ب دژواری دژی وێ ئەزموونا مافێ گەل کورد راوەستیا و کەسێ خوەل هەرێمێ نەکریە خودا، روودانا ڤێ گاڤێ ل رۆژئاڤا دهێتە ئەنجامدان باشترین گرۆڤەنە کو تنێ کورد هژمارا بەردەستا کڕین و فرۆشتنێنە د ناڤبەرا هەر چار داگیرکەران و زلهێزان دا و بەرێکانا بازرگانی و ئابۆریە دناڤبەرا وان دا، کانێ کی دێ پتر کێکێ ل سەر پشتا کوردان بۆ خوە بدەستڤە هینت.
ئەڤە واقعەک تەحل و دۆمدرێژە د دیرۆکا کوردستانێ دا کو بۆ پتر ژ سەد سالان دزڤڕت، هەر ژ دەمێ رێکەفتنا سایکس ـ پیکۆی و هەتا ڤێ گاڤێ، هەردەم بازرگانیا ب کوردان دهێتە کرن، ئەنجامێ نەهەڤگرتن و دژمنکاریا وان ب خوە، لێ مخابن هەموو جاران ئەو خوە دخاپینن و داگیرکەر و وەلاتێن زلهێز ب تراجودی و دەردەسەریێن خوە تاوانبار دکەن. ئاریشەیا مەزن ئەوە، ئەو ژ بیر دکەن کو ئەگەرێ سەرەکی یێ دەردەسەریێن وان هەر ئەو ب خوەنە، چو جاران زلهێزان، تایبەت ئەمریکا و بریتانیا بۆ کوردان چو نەکریە و ناکەن ژی، هەکە کێشەیا کوردی د بەرژەوەندیا خوە دا ئیستیغلال نەکەن. واتە ئەو کوردێن د گەرمەگەرما هەردو جەنگێن جیهانی دا، نەمازە دکۆنگرەیێن (سیڤەر ) و (لۆزانێ) دا نەبووینە دەولەت و نەشیاین مفای بۆ خوە ژ فاکتەرێن دەرانی و خۆیانی ببینن، گەلەکا ب زەحمەتە ب ڤی دەستودارێ کو هەردەم حزبێن کوردی دژی هەڤدو و دوبەرەکی بوویە سیبەرا وان ببینن. ئەڤجا باشترە ئێدی کورد زێدەتر خوە نەخاپینن، ئاڕیشەیێن خوە بکەنە ب ناسێن خەلکێ بیانی و وهەر دەم خوە بهێلنە ب هیڤیا وانڤە کو بکەنە دەولەت ل دەمەکی کو ئەو ب خوە نەدبەرهەڤ کو وی ناسناڤی وەربگرن.
