نەزانینا نەزانێ نەگوهدار، هەکە دروست بت ئەڤ دەستەواژە شوونا (الجهل المرکب) بگرت، ئێک ژ وان نەخوەشییێن جڤاکی یێن دۆمدرێژ و بەربەلاڤە، تایبەت د ناڤ جڤاکێن پاشکەفتی دا گەشە دکەت و گەلەک جاران دبتە ئەگەرێ زیانێن مەزن بێی کو خودانێ وێ نەزانینێ دانپێدانێ ب نەزانینا خوە یا (مرکب) بکەت. پترییا شەهرەزایێن ئاخڤتنێ وەسا تێدگەهن کو نەزانینا ساناهی، کامل، نەزانینا نەزانێ نەگوهدار سێ جۆرێن نەزانێنە ل دەڤ هندەک مرۆڤان و ئەڤا دوماهییێ ژهەردوکێن دی مالوێرانترە، ژ بەرکو نەزانێ نەگوهدار چو تشتی ژ بابەتی نزانت و ئەو ب خوە یێ نەزانە، د سەر هندێ ڕا لسەر هەلوەستێ خوە رژد دبت کو ئەو هەر یێ دروستە و خەلکێ نەدگەل بۆچۆنا وی د شاشن.
نەزانینا نۆرمال خودان دانپێدانێ پێ دکەت، دشیاندایە بزانت و خوە پێشبێخت، لێ نەزانینا خودان نزانت یێ نەزانە و لسەر وێ نەزانینی رژد ببت کو ئەو یێ دروستە و کار ب وێ نەزانینێ بکەت و خودانێ وێ کەسەک بەرچاڤ و سەرکێشییا خەلکەکێ نەهشیار و دووڤەلانک بکەت هینگێ کارەسات رووددەن و د سەر هندێ ڕا ئەو کەسێ بوویە ئەگەرێ وێ کارەساتێ راستییێ بەرەڤاژ دکەت و ئەنجامێ وێ نەزانینا ( مرکب) بۆ خوە ب سەرکەفتن دزانت، ئەوێ بەرەڤاژی بۆچۆنا وی بت ب کەسەکێ نەزان و دبت خائین و خوەفرۆش ژی ل قەلەم بدەت.
گرفتا مەزن ئەوە، وەختێ ئەڤ جۆرە کەسە کۆنترۆلێ ل سەر رەوشێ دکن، رۆژ بۆ رۆژێ دیتن و بۆچۆنێن وان دبنە کولتۆرێ سازییێن جڤاکی و بەرەڤ پاشەڕۆژەکا وێران دچت و ئەو هەر لسەر هەلوەستێ خوە یێ هشک رژد دبن و ئەنجامێن نەرێنی دهاڤێژنە سەر پاتکا خەلکەکێ دی و خوە ژ بەر بەرپرسیارییێ دهاڤێژن.
د درێژاهییا دیرۆکێ دا کورد بووینە قوربانییێن ڤێ نەزانینا کوژەک و دەستپێشخەرییا چارەکرنا کێشەیێ پتر د دەست وان کەسان دا بوویە، ژبەر هندێ ماینە ل دوماهییا کاروانێ وەلاتێن خودان ئالا و سینۆرێن خوە ییێن جوگرافی هەین و دژمن مفای ژ هەلوەستێ وان یێ هشک وەردگرن.
ل دووڤ ژێدەرێن دیرۆکا کوردان د هەمی بیاڤێن ژیانێ دا، تایبەت سیاسی و جڤاکی و لەشکەری و ئابۆری دا، وان گەلەک قوربانی سەرا مەژییێن نەزانێن نەگوهدار (الجهل المركب) داینە، خالا بالکێش هەردەم شانازییێ ب ئەنجامێن وێ نەزانینێ دبەن و مفای بۆ خوە ژ خەلەتییێن کوژەک وەرناگرن و گێژەڤانکا پاشڤەمانێ بەردەوام دبت.
