دەمێ ئەم ب چاڤەکێ عاتفی ل بابەتی دنێڕین و گۆتنا پێشیان:(( رەشۆ ب دەستێ خوە هەکە ئاڤێ تو بری)) ژ بیر دکەین و خوە ب هیڤیا ئەمریکا و وەلاتێن دیڤە دهێلین کو هەموو دەما وەک مە بڤێت د خزمەتا مەدا بن و ببنە پۆلیسێن خزمەتخوەش بۆ مە دژی وەلاتێن کوردستان داگیرکری و د خزمەتا مە دا بێ بەرانبەر کار بکەن، هینگێ ئەم د وەهمەکێ دا دژین و خوە دخاپینین، ژ بەر کو هەر دەم ئەم ب چاڤەکێ ئینسانی بەرێ خوە ددەینە رەفتارێن وەلاتێن زلهێز کو ببنە میرزا محمەدێ قورتالکەر و بهێن مە رزگار بکەن، ژ بەر کو ئەم رۆلێ کاریگەرێ بەرژەوەندخوازیا پراگماتی د پرۆسێسا پەیوەندیێن دەولەتان دا ژبیر دکەین کو تنێ ئەمریکا و رۆسیا و وەلاتێن دی یێن جیهانی ب چاڤەکی بەرژەوەندیێن ئابۆری و بەرفرەهـ کرنا هەیمەنێ بەرێ خوە ددەنە هەموو وەلاتان، تایبەت وەلاتێن لاواز و بێ سەروەری، ژ وان وەلاتان کوردستانە کو هندە سالن ژ ڤی دەردی دنالت. ڤێجا هەکە بەرژەوەندیێن پارچەکا کوردستانێ و ئەوان وەلاتان کەتنە دگەلێک، مینا هەرێما کوردستانێ و نها، هینگێ گەلەک باشە، بلا هەر وەزیر و مەزیرێن ئەمریکا و رۆسیا ل دووڤ بیرێن پترۆلێ بهێن سەردانا مە بکەن، ژ خوە هەکە نەکەتنە دگەلێک، مینا نها و رۆژئاڤایێ کوردستانێ، هەلبەت هینگێ کورد ل قومارێ دان، وەک گەلەک جاران لێداین و تنێ چیا هەڤالێن وان دمینن.
گۆرەی ڤێ سیاسەتا سرۆشتی کو ل دەف هەر کەسەکی هەیە، هەر دەمێ کورد ژ ئێشا دومدرێژا چەتەیێ و دوبەرەکیێ و داگێڕانێ بۆ هەڤدو رزگار بوون، هینگێ نە هەر چار دەولەتێن داگیرکەر تنێ نەشێنە کوردان، رەنگە دەولەتێن زلهێز ژی دێ هزرەکێ بۆ وان کەن کو رۆژەکێ ژ رۆژان کوردستان ببت ئالترناتیڤێ هەر چار دەولەتێن داگیر کەر کو نەچار ببت دانپێدانێ پێبکەن و ئالایێ خوە ل نەتەوەیێن هەڤگرتی بلند کەن.
لێ مخابن، گۆرەی وان شکەستن و کارەساتێن کوردان د درێژاهیا دیرۆکێ دا ب چاڤێن خوە دیتین، پڕانیا کوردان وەسا رەشبین بووینە کو هەڤگرتن و داگێڕانا وان بۆ هەڤدو خەونە، لێ ئەڤە راستیەکە کو کورد هەموو دەما شکەستن و دەردەسەریێن خوە دکەنە ب ناسێن وەلاتێن داگیرکەر و وەلاتێن زلهێز و ناکۆکیێن ناڤخوەیی و چەتەیا بۆ داگیرکەران دکەن پەراویز دکەن. واتە ژ دەستدانانا ل سەر برینێ دڕەڤن و بەردەوامیێ ب باجەدانا مفا وەرنەگرتن ژ دەرسێن دیرۆکی ددەن و خەلکێ بیانی ب دەردەسەریێن خوە تاوانبار دکەن.
کورد و وەهما نوکە و رەڤین ژ دەست دانانا سەر برینێ
