پشتی من کتێبا من (اسلام القرآن الی اسلام الحديث) یا هزرڤانێ ئەرەب جۆرج طەرابیشی یاکو 648 بەرپەڕان پێکهاتی خواندی و کورتییەک ژ ناڤەڕۆکا وێ ل ئەکوانتێ خوە بەلاڤ کری، هەڤالەکی لینکێ کتێبەکێ ب ناڤێ (من الهرطقة الی الاصولية قراءة في فكر (جورج طرابیشی) في كتابه من اسلام القرآن الی اسلام الحديث – ٲ د علی بن ٳبراهیم العجین) ژ 203 لاپەڕێن قەبارە مەزن پێکهاتی، وەک بەرسڤ بۆ جۆرج طەرابیشی کۆمێنت کر. پشتی من ئەو پرتووک ژی خواندی، ئەز وەسا تێگەهشتم کو نڤیسەری ب نەفەسەکا گەلەک بەرتەنگ و تڕانەپێکرن (استهزائی) و دیتنەکا رۆژهەلاتی ب ناڤێ (نەزرییا موئامەرێ) قالبدای پتر ل دووڤ دیتن و ئیجتیهاداتێن خوە یێن سەلەفی بەرسڤ داینە. هەچییێ هەردو پرتووکان ب دیتنەک ئەکادمی و ب وژدان بخوینت، دێ بۆ وی دیار بت، کانێ طەرابیشی چەند خوە زەحمەت دایە، هەتا ئەو پرتووکا مەزن ژ 648 بەرپەڕان پێکهانی ب ژێدەرێن دێرۆکی و سیرا پێغەمبەرێ ئیسلامێ سلاڤ لێ بن، ب بەلگە نڤیسییە. دەمێ من پرتووک دخواند گەلەک جاران ئەز ب خواندنا ژێدەر و هەوامشێن د بن دا نڤیسین دەخسی دبووم. من نەدیت طەرابیشی ناڤزڕاندن ب زانایەکی یان شرۆڤەکار و دیرۆکڤانەکێ ئیسلامێ کری، هەر تشتەکێ نڤیسی ب نەفەسەکە ئارام و ب لۆژیکێ رخنەیا عەقلی نڤیسییە. بەرانبەر نڤیسەرێ بەرسڤا وی د کتێبا خوە یا ژ 203 بەرپەڕا پێکهاتی دای، پتر ئیجتیهادات و رەئیێن خوە لسەر طەرابیشی فەرز کرینە و هندەک نموونە ژ کتێبا رەخنە لێ گرتی ب تنێ نەئیناینە، هەتا چۆیە کتێبێن وی یێن دی ژی و توهمەتبار کرییە کو وەکی مستەشرقەکی و خرابتر سەرەدەری دگەل ئیسلامێ و مەزاهب و شەخسییاتێن وێ کرییە و ب دیتنا وی، ئارمانجا طەرابیشی شکاندن و ب درەودەرێخستنا دینێ ئیسلامێ و پێغەمبەرێ وێ بوویە و کەتییە بن کارتێکرنا نڤیسەر و زەلامدینێن وەک، (بترسێ ئەنتاکی) و (یۆحەنایێ دیمەشقی) و کەسانێن دی یێن دژاتییا ئیسلامێ کری.. ب هەر رەنگێ هەی هەرئێک یێ ئازادە د بیروبۆچۆنێن خوە دا، ب مەرجەکی ناڤزڕاندنا یێدی نەکەت و نەشکێنت، تایبەت ئەو کەسێ مری و مرۆڤ نەکامیێن وی بکەت، ژ بەرکو کەس ژ چاڤێن مری شەرم ناکەت.. هەچییێ بڤێت پتر پێزانینان بزانت بلا هەردو پرتووکان بخوینت دێ پتر راستی بۆ زەلال بن.
