کتێبا (57 ساڵ خولانەوە لە ژێر وەهمی شۆڕش دا) حازم عەلی کوتک نڤیسیە. من ئەڤ کتێبە ژی سەرەڕایی درێژبوونا وێ کو ژ 500 بەرپەڕان پترە، وەک مفا ژێ وەرگرتن بۆ نڤیسینا تێکستێ سیناریۆیا درامایا خوە یا دووماهییێ خواند و من گۆت: خوەزی من بەری نوکە خواندبایە.
دیارە ناڤەڕۆکا ڤێ کتێبێ وەک نڤیسەری ب خوە نڤیسی، یاداشت و بیرەوەرینە ل سەر ژیانا وی یا نێزیکی 60 سالان د ناڤ خەباتا سیاسی و لەشکەری و جڤاکی دا، وەک پێشمەرگەیەکێ حزبا شیۆعی ل گەل ژیایە، لێ وەسا دیارە نڤیسەرێ ڤێ کتێبێ بەری هەر تشتەکی مرۆڤە، نڤیسەرە، شاعرە، خودان بیردانکەکا ب هێزە و پێشمەرگەیەکێ وەفادار و دلسۆزە و کوردپەروەرە، ژ بەر هندێ نڤیسەری دەست دانایە سەر برینێ و روودان ب نێڕینەکا ڕەخنەیێ، ب هووری و دووری شۆڤینییێ و هزرێن بەرتەنگ، ب رێژەیەکا باش ب بێلایەنی نڤیسینە و جودایی نەئێخستیە د ناڤبەرا پێشمەرگەیێن چو حزبێن هەرچار پارچەیێن کوردستانی دا و گەلەک زەحمەت پێ ڤە بریە.. ب ڕاستی من گەلەک خالێن بالکێش د ڤێ پرتووکێ دا خواندن و کورتییا وان هوونێن بەرێز ژی بخوینن:
ـ حەقیقەتا کوردبوونێ و ناسنامەیا نەتەوەیی یا کو ب زەحمەت هەمی کەس د شێن ب دەست ڤە بینن.
ـ پێزانینێن گرنگ دەربارەی شۆڕشێن کوردی د سالێن شێستان و حەفتییان و هەشتیان دا.
ـ بێهەلوێستی و ئینتیهازیەتا هندەک کادرێن بلند یێن حزبا شیۆعی و پەیوەندیکرن ب حزبێن دی یێن کوردستانێ، تایبەت پارتی و ئێکەتی د کاودانێن هەمەجوون دا پێخەمەت پلە و کورسیکان.
ـ شەڕێن براکوژییێ پتر ل گەل دژمنان و داگیرکەران، ل ناڤبەرا حزب و رێکخراوێن کوردی هاتینەکرن و پتر شەهید ب فیشەکێن براکوژییێ داینە.
ـ ڕۆلێ جەبهێ جۆت و بەرەی کوردستانی د ئێکگرتنا ناڤمالا کوردی دا.
ـ تاوانێن جەنگی یێن شەڕێن ناڤخوەیی نێزیکە وەک تاوانێن داعشێ بووینە.
ـ گەندەلی و ئەزۆکی، هەمی دەما د ناڤ کوردان دا هەبووینە، تایبەت پشتی قووناغا فیدرالی و دەستهەلادارییا سەقەت یا خوەیی گەهشتیە گوپیتکێ.
ـ جەهل و نەزانین ئەگەرەکێ دی یێ پاشکەفتنا شۆڕشێن کوردی بوویە.
ـ دبت چو حزبێن کوردی نەمابن خیانەت و چەتەیی نەکربت و رەوش هەتا نوکە بەردەوامە.
ـ بەرخودان و بەرگری د ئەنفالێن ڕەش دا و تۆمارکرنا روودانێن دیرۆکی د گەرما ئەنفالان و کێمیابارنکرنێ دا.
ـ هەلەبجە و کێمیابارانکرن و ئاهەنگا نەورۆزێ و هەلوەستێ هەڤگرتی.
ـ ڕۆلێ وێرانکارێ فەوجێن خەفیف و مستەشار و ئاغا و مەفرەزێن ئێستیخبارتا بەعسییان د شۆڕشێ دا.
ـ كوشتنا ئێخسیرێن پێشمەرگە ب دوڕندەترین شێوە ب دەستێن پێشمەرگەیێن حزبێن برا د شەڕێن بەردەوام یێن براکوژیێ دا.
ـ گومان و پێزانینێن نوو ل سەر هندەک ڕوودان و جەنگێن بەرخودان و بەرگریێ، مینا شەڕێن هندرینی و کوڕێ و هندەک دەڤەرێن دی ل هەرچار پارچەیێن کوردستانێ.
ـ هندەک جاران حزبێن کوردی ڕۆلێ دژی هەڤدو ژ ڕۆلێ دژمنان باشتر دیتیە.
ـ تەنگاڤییێن مەزن و خوەکوشتنا پێشمەرگەی، ب فیشەکەکا هەلگرتی دا دا کو ب ئێخسیری نەکەڤنە دەستێن دژمنی، پشتی دۆرپێچکرنێ و نەڕادەستکرنێ و هندەک جاران ڤەخوارنا میزێ ژ تێهنا دا و ب خوەڤەمیزتنێ د تەنگاڤیان دا.
ـ هەلوەستێن قارەمانانە ل دەڤ هندەک پێشمەرگەیان و تۆمارکرنا داستانێن دیروکی تایبەت د قووناغا ئەنفالێن ڕەش دا.
ـ ڕۆلێ شێرانە یێ ژنا کورد د گەلەک هەلوەستان دا.
ـ کارێن پێشمەرگەی ل کوردستانا رۆژهەلات و خودانکرنا خێزانان ب زۆری و بەردەوامییا ژیانا سەخت.
ـ نڤیسەری بەرپەڕێن سەرهلدانا بهارا 1991 و هەلبژارتنێن پەڕلەمانێ کوردستانێ و قووناغێن شەڕێن براکوژییێ و کەتنا سەددامی و قووناغێن د دووڤ دا ژ بیر نەکرینە و رووناهی ئێخستیە سەر گەلەک ڕوودان و هەلوەستێن تاکی و کۆمی د بیست سالێن دووماهییێ دا.
ـ ڕۆلێ ئاغا و شێخ و مەلان و کارتێکرنا وان ل سەر شۆڕشێ و جڤاکی و سیاسی ب بەلگە بەرچاڤ کریە.
ئەوێ بشێت ڤێ کتێبێ بخوینت، دبت بێژت خوەزی من بەری نوکە ئەڤ کتێبا بەرانبەر گەلەک کتێبان خواندبایە.
