پشتی مرۆڤەکێ مە 27 سالان مایە ل وەلاتەکێ ئۆرۆپی ب زاڕۆکڤە بووینە خودان دەبلجنسی و زڤڕییە کوردستانێ، بەری هەیامەکێ د شەڤبەرییەکی دا، ب زمانێ دیندارەکێ توندڕەو، وەسا رەخنەیا ئۆرۆپا و سیستەم و قانوونێن وێ دکر، ئەوێ نەشەهرەزا دا هزر کەت کو ولاتێن رۆژهەلاتا ناڤین یێ ل جهێ ئۆرۆپا و وەلاتێن وان یێ ل شوونا وەلاتێن رۆژهەلاتا ناڤێن جهێ تیرۆرێ و توند و تیژییێ و پترییا ئامەدەبوویان ژ وی باوەر دکر.
پشتی ئاخفتنا خودانێ دو جنسییان ب دوماهی هاتی، دانوستاندن ل ناڤبەرا من وی هاتە کرن و ئەڤا ل خوارێ نیڤشکێ وێ دانوستاندنێ بوو:
• کەکێ(…) پشتی 27 سالان تە کوردستان هێلای و تە مافێ پەنابەریێ و رەگەزنامەیا وی وەلاتی وەرگرتین و حالێ تە خوەش بووی، ئەرێ تو بۆچی نوکە ب خێزانڤە زڤڕییە وێ کوردستانا تو ژێ رەڤی؟
سەیدا، قانوون و سیستەمێن وان نەیێن دینینە و فەرق و جوداهییێ دکەن و ئەز حەز ژ وەلاتێ خوە دکەم. شوکر بۆ خودێ، من پارەکێ باش یێ هەی دێ ل کوردستانێ بۆ خوە شول پێ کەم.
• من گومانا هەی، ئەو قانوون و سیستەمێن وی وەلاتێ 27 سالان تو ب جنسی و شول و مافێن دی یێن مرۆڤی ئێخستی وەک تو دبێژی د باش نینن. هەکە تو نزانی ژی نوکە بزانە، ئەو قانوونا ل کوردستانێ هەی ژی تنێ بۆ هەژار و نەدارانە و ژ بەرپرسان ناگرت.
+بەلێ بەلێ، ئەز دزانم. بەس، وان غەدر ل کوڕێ من یێ زیرەک ل مەدرەسێ کر و هەقێ وی یێ ئێکێ بوو لسەر پۆلا خوە دەرکەڤت، وان یێ سێیێ دەرێخست. پشتی من سکالا تۆمار کری و ئەز گەهشتیمە وەزیرێ پەروەردێ، لیژنەک پێک ئینا و دووڤچۆن کر، دەرکەت، ئەو مامۆستایێ وە کری، وەک من پەنابەرە و هێجەتا وی ئەو بوو کو کوڕێ من بسورمانە و داعشێ هەڤالەکی وی مامۆستای کوشتییە و هندەک جاران کوڕێ من نڤێژ دکر و درەنگ دچۆ د دەرسێ دا، ژ بەرهندێ نومرێن وێ کێم کرن.
• گرنگ وان پێڕابوونێن قانوونی دژی وی مامۆستای وەرگرتن و تو گەهشتی وەزیری و دیار بوو، کەیسا کوڕێ تە نەبوویە دیاردە و حالەتکێ تایبەت بوو، بەلێ ل ڤێرێ تو نەشێی بگەهی چو وەکیلوەزیران، هێشتا دۆرا وەزیران نەهاتی، هەکە تە چو واستە نەبن. کەکۆ، پرسا دوماهییێ دێ ژ تە کەم: ئەرێ تو یێ حازری تەنازولێ ژ جنسییا خوە یا وی وەلاتێ ئۆرۆپی بکەی و ئێدی ب وێ جنسییێ نەزڤڕی وی وەلاتی و ل ڤێرێ خزمەتا دینێ خوە و قەومێ خوە بکەی؟
بەرسڤا مرۆڤێ مە دای، پتر ژ هێجەتەکێ گرت و ژ بەرسڤێ ڕەڤی و ب چو رەنگان نەیێ ئامادە بوو جنسیا وی وەلاتی بهێلت. واتە هەر دەمێ کوردستان نەخوەش بوو، جارەکا دی دێ زڤڕتە وی وەلاتێ جنسییا دووێ لێ وەرگرتی.
پرسا سەرەکی ژ نڤیسینا ڤی بابەتی ئەوە: ئەرێ نوکە، ژ بلی وان بەرپرسێن خودان دەبلجنسی و هەرێما کوردستانێ ب ڕێڤە دبەن، چەند کەسێن دی وەکی مرۆڤێ مە هەنە، خودان جنسییا دووێ و مافێن وان ل ئۆرۆپا و ئەمریکا و وەلاتێن دی یێن پێشکەفتی دپاراستینە و ب هەر ڕێکا هەیی زڤڕینە کوردستانێ و جهێن خەلکێ دی گرتینە و سەرەدەرییا مشەخوران دگەل کوردستانی دکەن. واتە ل دووڤ کاودانان، دەمێ زەمینە بۆ وان جۆرە پەنابەران خوەش بوو و ڤیا دێ زڤڕنە کوردستانێ و بەرێکانێ بۆ زەنگینبوونێ دگەل بەرپرسێن دز و گەندەل کەن، دەمێ رەوشا کوردستانێ تێکچۆ، جارەکادی دێ زڤڕنە وەلاتێن جنسییا دۈێ ژێ وەرگرتی.
خالا بالکێش ئەوە پترییا پەنابەرێن پشتی سەرهلدانێ چۆینە ئۆرۆپا و ئەمریکا و ئوسترالیا و وەلاتێن دی ئەون یێن کەیسێن وان دژی دەستهەلاتا خۆمالی یا هەرێمێ و مافێ پەنابەرییا سیاسی یان مرۆڤایەتی ب وان جۆرە کەیسان وەرگرتی. د سەر هندێ ڕا، هندەک ژ وان تایبەت ژ بەر پۆستان دزڤڕنە هەرێمێ و بنێن هاونان کون دکەن داکو بگەهنێ. ڤێجا نزا دێ چەوا باوەرییا خەلکێ هەرێمێ ب وان هێت کو هەکە تەنگاڤییەکا دی وەک تەنگاڤییێن هاتنا داعشێ ل سالا 2014 و هاتنا حەشدێ ل 2017 ب سەر دا هات کو ئەو تۆڤ کەسێن سەرکردە و خودان دەبلجنسی دێ هەر مینن و خەلکێ خوە بپارێزن؟
ئەوا مایی و من نەگۆتی، ئەو جامێرێن پەنابەر بووین و زڤڕین خزمەتا کوردستانی، ب هەر ڕێکا هەی، ب سیستەمەکێ زانستی یێ پێشکەفتی کری یان پرۆژەیێن مرۆڤایەتی و خزمەتکاری پێشکێشی خەلکێ خوە کرین، یان جارجار دهێن سەرەدانا مرۆڤێن خوە دکەن دزڤڕنە وەلاتێ خوە یێ دووێ و کارێ خوە دکەن بێی تەماعییا پلە و پۆستێن هەرێمێ بکەن، ب بەر ڤێ رەخنەیێ ناکەڤن و بەرەڤاژی جهێ دەستخوەشییێ نە و قەنجییا وان ناهێتە ژ بیر کرن.
