دوماهی پرتووک من ل دەستپێکا سالا نوو خواندی پرتووکا نڤیسەرێ مسری، (د. فەرج فۆدە) بوویە، ب ناڤونیشانێن بەری کەڤتنێ (قبل السقوط) نڤیسەری ئەڤ پرتووکە ل سالا 1985 نڤیسیە، بەری هەفت سالان کو ببتە قوربانێ تیرۆرێ ب دەستێن ئیسلاما توندرەو، بەرانبەر هزرێن خوە یێن لیبرال و علمانی.
راستە ئەڤ پرتووکە ژ کۆمەکا کورتە گۆتارێن نڤیسەری پێکهاتیە، لێ بۆ وی دەمی تشتەکێ جوان ب وێرەکی نڤیسیە، هەتا دوماهیێ باجە ب گرانی دایی و ئەو ژی بوویە ژ شەهیدێن قەلەمێ ئازاد. نڤیسەری د ڤێ پرتووکێ دا ب کورتی بەحسێ هندەک بەرپەران ژ ئیسلاما سیاسی کریە، هەر ژ سینگێ ئیسلامێ، هەتا گەهشتییە سالێن هەفتیان و هەشتیان ل سێ گۆشێ سعۆدیێ و مسرێ و سۆدانێ، نڤیسەری ئیسلاما سیاسی هەر ژ پەیدابوونا ئیخوانان لسەر دەستێ بابێ وانێ رۆحی حەسەن ئەلبەنا هەتا دەمێ نڤیسەر تێدا زیندی لسەر سێ قوتابخانەیان پۆلینکرنە:
• کلاسیکی ـ شۆڕشگێڕێ یان جیهادی ـ سامانداری و یا دووێ ژ هەردوکێن ئێکێ گرنگتر ل قەلەم دایە… هەر وەسا نڤیسەری ئاماژە ب هندەک خالێن گرنگ ژ گوهۆڕینا دستوورێ سۆدانێ دایە کو ب فەرمانا ئێکسەرا سەرۆکێ وی دەمی ( جەعفەر ئالنومەیری ) دەمێ تنێ گوهەڕتنا ئەلیف لامەکێ کریە دستوورێ شەریعەتێ ئیسلامێ و تەتبیقکری و د ئەنجامدا، دەستێن گەلەکا بڕین و هەر وەسا جەلدە داین و رەجماندین، ب پیرۆزیا هندەک شێخێن وەک قەرەزاوی. نڤیسەری نموونە ژی ب بەلگە نڤیسینە. ئەڤە زێدەباری هندەک بابەتێن دی د 160رووپەلێن قەبارە ناڤنجی دا بەلاڤ کرینە.
