جۆتوەرییا کەسۆکی (الازدواجییة الشخصية) وەک ئێشەکا جڤاکی یا بەربەلاڤ د ناڤ جڤاکێن پاشڤەماین دا و هێشتا کارتێکرنا شەریعەتێ کیتابێن پیرۆزێن ئەسمانی لسەر هەی و رۆحا علمانییێ (سیکۆلار)یێ ب دروستی نەگرتین، پترییا وان د ئازاد نینن د هزر و بۆچۆنێن خوە دا و نەشێن ب ساناهی بڕیارێن دروست بدەن و د ناڤ شەڕەنیخا ئایدیۆلۆجیێن قەومی و دینی دا بەرزەبووینە.
جڤاکناسێ ناڤدارێ ئیراقی، دکتور عەلییێ وەردی د پرتووکێن خوە دا گەلەک بەحسێ ڤێ دیاردەیێ د ناڤ جڤاکێ عیراقێ دا کرییە. هەلبەت ب حوکمێ دیفاکتۆیێ هەی جڤاکێ کوردستانا باشور ژی وەک پارچەیەک ژ جڤاکێ عیراقێ و ئیسلامێ، ژ وان جڤاکانە، ئەنجامێ داگیرکرنا وی یا هزری د درێژاهییا دیرۆکێ دا، ب تەبیعەتێ خوە یێ هەڤدژە و جۆتوەرییا هزری هەیە و د هەڤڕکییا هەلبژارتنان دا ئەنجامێ ناخەکێ هەڕفتی و نەئاڤاکری، بەردەوام هەڤدژی و شەڕەنیخ د ناڤبەرا ئایدیۆلۆجییێن قەومی و دینی و هزرێن دی دا دژوارتر لێ دهێت.. دبت پترییا وان دەنگدەران، د ناڤبەرا هەردو هزرێن سەرەکی یێن قەومی و دینی دا ژ ئالەکی و ئایدیۆلۆجییێن کێمینە، مینا: لیبرالی و مارکسی و سۆشیال و چەپڕەو دا ژ ئالییەکێ دی تەڕابەڕا ببن.. ل دووڤ رەفتارێن جەماوەرێ حزبێن هەرێمێ د چار حەفتییێن دەربازبووین دا من د بانگەشەیا هەلبژارتنێن نوونەرێن ئیراقێ دا دیتین، ڤێ جارێ دێ پتر هەڤدژییا جڤاکی تایبەت ل دەڤەرا بادینان د ناڤبەرا باوەردارێن قەومی و دینی دا دیار بت و ل ژێر فشارا کارتێکرنا دودلییی پترییا دەنگدەرێن هەرێمێ د ئازاد نابن وژدانا خوە تەنا بکەن.
هەژی گۆتنێیە، ل دووڤ تێکستێن پیرۆز، نابت تو مرۆڤەک قەومی بی و د هەمان دەم دا دینی ژی بی. واتە ئەوێ قەومی بت ژ دینێ ڤاڕێبوو، یێ دینی و قەومی ژی بت منافقە، تنێ ئەوێ ژدل باوەری ب دینێ ئیسلامێ هەبت ئەو یێ سەرفەرازە و رووسپییە لسەر دونیایێ و بن دونیایێ. ئانکۆ کەو و خەو د باوەردارییێن دینی و قەومییەتێ دا پێکڤە نینن، ئەو تاکێ خوە ئێکلایی کری و ژ هزرێن جۆتوەری ئازاد بووی ئەو دشێت بڕیارا دروست بدت و پاشەڕۆژا وەلاتێ خوە رۆهن بکەت، گرنگ نینە کیژان ئایدیۆلۆژی بت، گرنگ ئایدیۆلۆجییەکا هەڤچەرخ و نەتەوەیی و مرۆڤایەتی بت و بەرگرییەکا شەرعی ژ ماف و پرنسیپێن ژ دەستایێن کوردستانێ بکەت. پرسیار ئەوە، ئەرێ سیاسەتڤانێن کوردی ئەڤ جۆرە ئایدیۆلۆجیێن سیاسی د مەژییێن تاک و جڤاکێ کوردی دا چاندینە؟ بەرسڤ بلا بۆ دەنگدەری بمینت.
