ئەگەرەک ژ ئەگەرێن پاشڤەمانا مللەتێ کورد ئەوە کوهەتا نوکە خۆسەرنەبووی، رێژەیا پترییا تاکێ وی، تایبەت دەمێ هندەک ژ وان دگەهنە پلەیا سەرکێشییێ، وەک ژێییەکێ مەنزۆما کۆمی یا جڤاکێ خوە یێ خێلەکی د درێژاهییا دیرۆکێ دا نەشییایە وەکی پێدڤی هزر بکەت و خوە بگوهۆڕت و مفای ژ خەلەتییێن خوە یێن بەردەوام وەربگرت، ژ بەرکو بوویە ئێخسیرێ عەقلەکێ دەمارگیریێ و هەلچۆنێ (انفعال)ێ و عاتیفێ مشەوش کری.
ئەنجامێ وێ هزرا هێشتا ب هزرا تاکێ عەشیرێڤە گرێدای، هندی شکەستنان ببینت، شوونا بهێت و دانپێدانێ ب خەلەتییێن خوە یێن دیرۆکی بکەت و داخوازییا لێبۆرینێ ژ جڤاکێ خوە بخوازت و هشیار ببت و ب لۆژیکێ عەقلێ هزر بکەت و کار بکەت بۆ دیتنا رێکەکا باشتر داکو مار دوجارکی دکونەکێ ڕا پێفە نەدەت و بگەهتە ئارمانجێن خوە یێن ژ دەستداین، لێ ئەو دێ هەر ل سەر رکا خوە رژد بت و ناسنامەیا نەتەوەیی کەتە چەکێ بێبەڤل و ب نەفەسەک ژ خوەنەگرتنێ و رکمانییەک دەمارگیر، بۆ ئالێ دی یێ کو نەدگەل وی دێ هەر خوە راستودورست دیار کەت و ئالیێ دی خەلەت و دبت خائین و خوەفرۆش ژی ل قەلەم بدەت و ل سەر خەلەتییا خوە رژد بت، ژ بەرکو فاکتەرێ ب هێزێ ناسنامەیا نەتەوەیی د دەست دانە.
ئەم د شێن ریفراندۆما گەلێ کورد کو بەری سێ سالان ل هەرێمێ هاتییە ئەنجامدان بکەینە نموونە بۆ ڤێ نێڕینێ، راستە هەکە ئەم پرسیارا هەر کەسەکی کورد بکین وی دەولەت دڤێت یان بندەستییا داگیرکەران، هەلبەت وەک هەر تشتەک زکماکی (فطرة) ل دەڤ مرۆڤی هەی، پڕانییا جڤاکی دێ دەولەتێ هەلبژێرت، وەک مافێ وان یێ شەرعی، بەرانبەر ئەو رێژەیا کێم ئەوێن ب ئاقلی سەرەدەرییێ دگەل واقعی دکن دبینن سەرەڕایی کو مافێ چارەنڤیسساز مافەکێ وانێ رەوایە کو وان ژی دەولەت هەبت، لێ ژ بەر وی دیفاکتۆیێ هەیی، ئەنجامێن نەرێنی یێن وێ پترن ژ یێن ئەرێنی و دبنە رکمانێن وێ پرۆسێسا دبینن کو نەیاگونجایە.
د ڤێ هەڤڕکییا نەئالیسەنگ کری دا، هندەک ئالییێن کوردی هنبەری هەلوەستێ وێ کێمینەیێ چەکێ ب هێزێ درووشمێ نەتەوەیی، ب هەناسەیەک دەمارگیر بلند دکەن، بەرانبەر ئەوێن ب ئەقلی کار دکەن و ئەو رێژەیا کێم ژی دکەڤتە د نێڤبەرا نالوبزماران دا. هەلبەت هەتا ئەوێ پتر ب ئەقلی ژی سەرەدەریێ دکەت، دەمێ دکەڤتە هەلوەستێ ترس ژ خودانێ ئالییێ ب هێزتر و شەرم ژ ناسنامەیا خوە یا نەتەوەیی، پڕانییا وان ژی نەچار دبن دکەڤتە هەلوەستی و دوماهییێ بڤێت نەڤێت ل دووڤ ئالیێ درووشمێ نەتەوەیی هەلگرتی دچن. ریفراندۆما هەرێمێ ژی ل 25 پاییزا 2017 رەنگە هۆسا هاتبتە ئەنجامدان.
ئانکو راستە هەتا رۆژا رێفراندۆمێ ژی ژ بەر ئەنجامێن وێ یێن نەرێنی ب دلێ هندەک ئالییان نەبوو کو د وان کاودانێن بەردەوامییا تەڕابەڕا بوونا ناڤمالییا کوردی دا ریفراندۆم بهێتە کرن، لێ ب هاندەرێ پارازتنا ناسنامەیا خوە یا نەتەوەیی و هندەکان ژی ترس ژ بڕینا نانی، گەلەکا ژ وان ژی چاڤێن خوە نقاندن و کرە (مغامەرە) و دەنگێ خوە ب (بەلێ) دا.
دبت هەکە نها فرۆید یێ ساخبایە و ڤەکۆلینەکا زانستی ل سەر شرۆڤەکرنا دەروونا تاکێ کورد کربایە، گەهەشتبا ئەنجامەکێ وەسا کو رێژەیەکا کێم ژ خەلکێ کوردستانێ ژ ئالیێ دەروونیڤە د خراب نین. ژ بەر کو دەمێ کەسۆکییا کورد دکەڤتە بن ئەنجامێن شرۆڤەکرنێن زانستی، رەنگە بۆ وی دیار ببایە کو (ئەزا) تاکێ کورد ئەزەکا لاوەز و نەساخلەمە و خۆسەرییا خوە نینە، پڕانییا جاران دکەڤتە بن کۆنترۆلێن نەهۆشییێ (ئەزا نزما) کو ژ هێلێن سۆرێن ژیانا تاکی پێک دهێت و (ئەزا بلندا) بهانە و پرنسیپ و پیرۆزیێن جڤاکی. ئانکو نانبڕین و خوەشییێن ژیانێ د بنە چەکێ نەهۆشێ مرۆڤێ و خۆسەری و ژێیاتیێن ئەخلاقی و جڤاکی د بنە چەکێ( ئەزا بلندا) جڤاکی و (ئەزا) کو دەربڕینێ ژ ئالیێ کەسۆکییا مرۆڤی یا بەرچاڤ دکەت دبتە ئێخسیرا وان هەردو ئەفریتان ژ کەسۆکییا مرۆڤی، ژ بەر هندێ ئەڤە چەرخێ 21 یە و هێشتا نزانت ب دورستی هزر بکەت و بڕیارێ ب وێرەکی بدەت و بەردەوام دیرۆکا خوە د بازنەیەکی دا دزڤڕینت و شیانێن شکاندنا وی بازنەی نین کو ب لۆژیکێ ئەقلی بشکنت، پڕانییا جاران عاتیفە حاکمێ رەفتارێن وییە ژ بەر هندێ دانا باجێ بەردەوامە .. دبت هندی هۆسا بمینت، هەر بەردەوام ژی بت. ئانکو بەری رێکخستنا ناڤمالییا گەلێ کورد و هەڤگرتنێ، تاکێ کورد پێدڤی زهنییەتەکا ساخلەم و ئازادە داکو بشێت خوە ژ دووالیزما دانا بڕیارێ رزگار بکەت و رێزێ ل یێ بەرانبەر بگرت کو ب هەڤڕا دیتنەکا هەڤپشک بۆ گەهشتنا ئارمانجێن ژ دەست دای چێ کەن.
رکمانی و تێکەتن و ژخوەنەگرتنا تاکێ کورد و مالوێراننیا بەردەوام
