جڤاکەک هێشتا دیتنا پتریا وی دیتنەک وەسا نەزان و پاشڤە مای بت، دەمێ هندەک تشتێن سرۆشتی و ب خوە دژینگەهێ دا چێ دبن دبینت، مینا پرتێن عەوران، پێلێن دووکێلێ، نەخشێن فێقی و درامەتی ل بەر چاڤان دبنە سیمبۆلێن پیرۆزێن دینی و باوەریەک مکوم پێ دهینت کو ئەو تشت راستیە و موعجیزا خوادییە، ئانکو هێشتا گەلەک بۆ ڤی جڤاکی مایە کو هزرا خوە ژ ئەفسانێ و وەهمێ رزگار بکت و بەرەڤ میتۆدێ زانستی و مەنتقی بچت. دوور نینە، مەودایێ هزرا ڤی خەلکی و هندیێن چەرمسۆر و هندەک هۆزێن شارستانی نەگەهشتی یێن ئافریکا و جهێن دی یێن جیهانێ یێن کو هندەک باوەریێن سەیر ب هندەک تشتان هەین کێمتر نەبت. ژ بەر کو دەمێ ئەنجامێ دۆخەک زانستی پرتەک عەوری د هزرا تاکێ کوردی دا دبتە بوونەوەرەک یان پەیڤا ناڤەکێ پیرۆز و باوەر دکن کو خودایێ مەزن خودانێ ڤێ زڕە گەردوونێ دێ هێت ناڤێ خوە یان پەیامبەرەکی خوە ژ عەوران یان دووکێلا جگارێ چێ کەت داکو هەبوونا خوە و خوەشتڤیێن خوە بۆ خەلکی بسەلمینت. چو جاران وی خودایێ مەزن و خودانێ موعجیزاتان و ((کن فەیەکون)) مننەت ب پرتەک عەوری یان پێلەک دووکێلێ یان فێقیەکی یان گیایەکی و هەر تشتەکێ دی نیە کو بکەت بەلگە و هەبوونا خوە ب رێکا نڤیسینا ناڤێ خوە یان پێغەمبەرەکێ خوە و وان تشتێن وی ئافراندین بۆ بەندێن خوە یێن هەر وی ئافراندین دیار بکەت، دا کو خەلکەگ باوەر بکەت خودێ یێ هەی. ئەڤە هەستکرن ب کێماسیەک نەهۆشیە بۆ خەلکەک دی کو گومان ژ وان پیرۆزیان هەبت، یان هەما دبنی دا باوەری پێ نەبت.
ئەڤ راستیە بۆ مە رۆهنتر لێ دهێت. دەمێ هەر ئێک ژ مە ب هووری ل دیوارەکی، یان کەڤرەک گیرهێ گرتی بنێڕت، تایبەت هەکە کەڤن ببت و دەرز و کەلشتە کەتبنێ، و ئاڤ پێدا هاتبت، دێ گەلەک وێنەیێن جۆرا و جۆر د هزر و خەیالان دا دیار بن، ڤێجا چ وێنەیێن تشابەتی (تەجریدی)، سۆریالی و دادائی یێن مرۆڤان بن یان بوونەوەرێن دی بن. خواندنا فنجانێ و گەرۆدەیا دمینتە ل بنێ فنجانێ ژ هەمان خەیالا دەستپێکی یا مرۆڤی هاتیە و نها ژی خەلکەک زۆر ل جیهانا رۆژهەلاتی باوەر ژ وان فێلبازان دکەت ئەوێن ب وێ دەجالیێ و شەعوەزێ رادبن و بەخت و پاشەڕۆژێن وان بۆ رۆهن بکن.
دهێتە زانین کو هزرا قوتابخانەیا دادائی یا هونەری ژ وان جۆرە وێنەیێن سرۆشتی هاتیە. بۆ نموونە، دا گلاسەکا ئاڤێ ب دیواری دا کەن و باوەری ب وان وێنەیێن ب وێ تەڕاتیێ لێ دکر دهینا کانێ چاوا سۆریالیا باوەری ب دیمەنێن خەونان و جیهانا درڤەی قانوونێن سرۆشتی دهینا و کەڤالێن خوە و تێکستێن خوە یێن ئەدەبی ب وی کەرەستەی دئافراندن ، بالا خەلکەکی دکێشا. ئەڤە خەلکەکی وەک هونەر خەیال بۆ خوە مفا ژ ڤان جۆرە دیاردەیێن سرۆشتی و ئاشۆپی دبینت، لێ هێشتا پڕانیا خەلکێ مە وان خیچومیچێن ژ عەور و دووکێلان چێ دبن، وەک خوداوەندێن پیرۆز دبینت و خوە پتر دکەتە ئێخسیرێ هزرێن خوە یێن وەهمی و ڤەمای و نەشێت پرسا مافێ خوە بکەت و دهێلتە ب هیڤیا وی خودای ڤە ئەوێ خەلکەکی ب ناڤێ وی گۆتی:(( خودێ یا گۆتی ژ تە حەرەکەت ژ من بەرەکەت.))
دیتنا جڤاکی یا پاشڤە مایی
